SBASHK-u për Ligjin e skemave pensionale: Qeveria po vazhdon me kryeneçësi dhe diskriminim

Sindikata e Bashkuar e Arsimit, Shkencës dhe Kulturës e Kosovës (SBAShK), ka reaguar ndaj Qeverisë së Kosovës sa i përket Ligjin e skemave pensionale dhe se nuk ka konsultuar palët për ndryshimin e këtij ligji.

Përmes një komunikate për media nga SBASHK-u është thënë se Qeveria nuk është duke bashkëpunuar dhe se edhe me ndryshimet e reja, në Ligjin për skemat pensional ka prapë diskriminim.

“Qeveria Kurti duke u trimëruar me numrin e votave vazhdon të nxjerr Ligje e të bëj ndryshime në Ligje pa bërë konsulta me palët që preken me këto vendime e Ligje. Një veprim i tillë ka ndodhur edhe me Projektligjin për ndryshimet në Ligjin për skemat pensionale të financuara nga shteti”.

“SBASHK-u në pritje që do të ftohen sindikatat nga komisioni dhe Ministri Murati për të ofruar propozime të argumentuara lidhur me këto ndryshime, kishte përgatitur argumente, fakte e propozime konkrete , që do të bënin zgjidhje të përhershme dhe të drejtë për të gjitha palët që preken me këtë Ligj”.

Kjo Qeveri qasjen e SBASHK-u e ka quajtur si “të gabuar”.

“Mirëpo, Qeveria vazhdoi me qasjen e gabuar e me kryeneçësinë dhe u votuan ndryshime sa për të thënë e teksa diskriminimi vazhdon dhe zgjidhjet janë afatshkurta e të padrejta”, thuhet në njoftim.

Sipas SBASHK-ut, me këto ndryshime preken ligjet tjera, siç është rasti “me Ligjin për statutin e punëtorëve të arsimit të viteve të 90-ta, i cili si vite kontributdhënëse ua njihte atyre që punuan në sistemin arsimor të Republikës së Kosovës kohën nga viti shkollor 1989 e deri më 31 tetor 1999”.

Më 27 korrik, Kuvendi i Kosovës kishte miratuar Ligjin për Skemat Pensionale.

Me 76 vota për, asnjë kundër dhe asnjë abstenim, deputetët e Kuvendit të Kosovës kishin votuar këtë projektligj, i cili parasheh që pensionistëve të përjashtuar nga skema për stazhin pensionale për punën në vitet 90-ta, nga tash e tutje do t’iu numërohen vitet e punës.

Të pranishëm në votim ishin edhe deputetët e Lidhjes Demokratike të Kosovës, të cilët votuan për këtë projektligj, ndërsa deputetët e dy partive tjera opozitare – Partia Demokratike e Kosovës dhe Aleanca për Ardhmërinë e Kosovës nuk morën pjesë në votim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.