Lajme

Samsung-u zgjedh Texas-in si vendin e fabrikës së re të çipave


Kompania Samsung ka zgjedhur një vend afër qytetit të Taylor-it në Texas për fabrikën e tij të re të çipave kompjuterikë prej 17 miliardë dollarësh.

Kjo lëvizje e kompanisë vjen mes mungesës globale të gjysmëpërçuesve dhe përbën investimin më të madh të gjigantit elektronik koreano-jugor në Shtetet e Bashkuara të Amerikës.

Agjencia e lajmeve, “BBC”, tregon se fabrika e re pritet të krijojë dy mijë vende pune në industrinë e teknologjisë.

Ngjashëm si disa nga rivalët e vet, Samsung-u po garon për të zgjeruar prodhimin e çipave në SHBA për të trajtuar çështjet e zinxhirit të furnizimit.

“Me kapacitet më të madh prodhues, do të jemi në gjendje t’u shërbejmë më mirë nevojave të klientëve dhe të kontribuojmë në stabilitetin e zinxhirit global të furnizimit të gjysmëpërçuesve”, ka thënë Kinam Kim nga Samsung-u.

Gjithashtu ky impiant pritet të jetë funksional në gjysmën e dytë të vitit 2024.

Lëvizja vjen pasi presidenti amerikan, Joe Biden, ka shtyrë gjigantët e çipave të rrisin prodhimin e tyre në vend.

Ndërkaq, zyrtarët e Shtëpisë së Bardhë kanë thënë se objekti i ri do të ndihmojë në “mbrojtjen e zinxhirëve të furnizimit, rigjallërimin e bazës së prodhimit dhe krijimin e vendeve të mira të punës”.

“Rritja e prodhimit vendas të çipave gjysmëpërçues është kritike për sigurinë kombëtare dhe ekonomike”, ka theksuar sekretarja e tregtisë në SHBA, Gina Raimondo.

Kurse Greg Abbott, guvernatori republikan i Texas-it, ka shkruar në Twitter “mirë se erdhe në Texas Samsung”, teksa postoi fotografi të një ngjarjeje që prezantonte planin.

“BBC” zbulon gjithashtu se nga një deklaratë e zyrës së guvernatorit, kompania do të marrë një grant prej 27 milionë dollarësh për krijimin e vendeve të punës.

Lidhur me çipat e prodhuar atje, do të përdoren në një sërë teknologjish, duke përfshirë celularin, rrjetin 5G, informatikën me performancë të lartë dhe inteligjencën artificiale.

Samsung është një nga prodhuesit më të mëdhenj të çipave në botë me më shumë se 20 mijë punonjës në të gjithë SHBA-të.

Për kompaninë, njoftimi i fundit e çon investimin e saj total në ekonominë më të madhe në botë në 47 miliardë dollarë.

/Albanianpost.com


Lajmet kryesore