Pajisje

Samsung prezanton teknologjinë e re të ekranit Sensor OLED Display


Samsung, gjiganti i teknologjisë nga Kora e Jugut, ka zbuluar një teknologji të re, ekranin e quajtur Sensor OLED Display. Ky ekran mundëson leximin e gjurmëve të gishtit nga çdo pjesë e ekranit.

Sensori OLED në ekranin e telefonave celularë mundëson leximin e gjurmëve të gishtit pavarësisht nga pjesa e ekranit që prek përdoruesi. Kjo ndryshon nga telefonat celularë tradicionalë, ku sensorët e gjurmëve të gishtit vendosen në një zonë të veçantë të ekranit.

Ekrani i ri OLED i Samsung mund të “lexojë” në çdo pjesë gjurmët e gishtit

Përdorimi i teknologjisë së Sensor OLED që “lexon” gjurmët e gishtave në çdo pjesë të ekranit mund të shfrytëzohet edhe për të monitoruar zemrën dhe për të matur presionin e gjakut. Samsung pretendon se ky sensor është më preciz se pajisjet në treg.

Për të matur presionin e gjakut, përdoruesi duhet të vendosë dy gishta në ekran. Drita OLED reflektohet ndryshe në varësi të tkurrjes dhe relaksimit të enëve të gjakut.

Përveç teknologjisë së Sensor OLED, Samsung prezantoi gjithashtu ekranin Rollable Flex, i cili rritet pesë herë kur “zbërthehet”, dhe konceptin e telefonit celular Flex In & Out, i ngjashëm me Galaxy Fold.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore