“Sali Berisha nuk ka fuqi të jetë mbi statutin”

Kryetari i Partisë Demokratike (PD), Lulzim Basha në një konferencë me drejtues të PD-së, Grida Duma dhe Gazment Bardhi, të shtunën e 23 tetorit, është shprehur se ish- kryetari, Sali Berisha nuk mund të dalë mbi statutin.

“Sali Berisha nuk ka ndonjë fuqi për të thirrur asnjë institucion të partisë. Partia ka institucionet e saj. Berisha mund të thërrasë institucione paralele, në përpjekje për ta bërë partinë e tij bunker”.

Ai theksoi se e ka thirrur Kuvendin dhe do ta thërrasë, por vetëm për çështje statutore.

“Cilido qoftë t’i drejtohet institucioni të partisë dhe jo bunkerit. Deri para tre muajsh nuk kishte asnjë problem me mua. Çfarë ka ndryshuar përveç interesit vetjak për të çuar PD në greminë? Vendimi im, vendim i një lidershipi të përgjegjshëm. Vendim që duhej merrej”.

Lidhur me deklaratën e Berishës, se mund të kandidojë për kryetar të PD-së, Basha theksoi se zgjedhja e tij në krye të partisë, është bërë sipas statutit dhe “nuk kam ndërmend të harxhoj kohë me reflektim, tollovi, përpjekje për të përçarë PD”.

“Kuvend që të marrë në shqyrtim vendimet e qeverisë së SHBA-ve nuk ka për të pasur kurrë, sa të jem unë kreu i partisë. Qëllimi për momentin është të përfundoj mandatin e dhënë nga shumica dërrmuese e demokratëve, duke e çuar partinë drejt objektivave të saj, rrëzimin e regjimit Rama”.

Gjatë konferencës, kryedemokrati ka vënë theksin tek ngritja e tre komisioneve hetimore për zgjedhjet, inceneratorët dhe Becchettin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.