Ish-nënkryetarja e Prishtinës nga radhët e Partisë Demokratike të Kosovës, Donjeta Sahatçiu, ka reaguar pasi kryetari Përparim Rama e ka shkarkuar pasi sipas tij, ka ngecje në fushën e digjitalizimit, e cila është udhëhequr nga Sahatçiu.
“Prishtinë deri herën tjetër, faleminderit. Një copëz e misionit u arrit. Nga një grua të parë nënkryetare në historinë e Prishtinës, nesër vjen një tjetër grua nënkryetare”, shkroi ajo në Facebook.
Sahaçiu ka folur edhe për pasardhësen e saj Jehona Lushaku – Sadriun, e cila do e gjejë në zyrë një mural për gratë që e mbështetin njëra tjetrën.
“Jehona, në zyre e gjen shenjë këtë mural të qëndisun me shumë dashni: gratë mbështesin njëra tjetrën. Të priftë e mbara, sytë katër. Për të tjera, kemi kohë. Misioni vazhdon”.
Kryetari i Prishtinës, Përparim Rama, ka njoftuar përmes një shkrimi se ka shkarkuar nga pozita e nënkryetares Sahatçiun e cila gjithashtu ka ushtruar edhe detyrën e drejtoreshës së Arsimit.
“Ky projekt, siç e dini ka qenë një prej premtimeve të bëra, duke dashur që të përmirësoj e modernizoj institucionet e Kryeqytetit. Andaj, për shkak të vonesave të shumta në proces dhe ngecjes së projektit të digjitalizimit, kam marrë vendim që të liroj nga detyra, Donjeta Sahatçiu, nga pozita e nënkryetares dhe pozita e ushtrueses së detyrës së drejtores së Arsimit”, ka njoftuar Rama.
Sipas Ramës, në funksion të përshpejtimit të transformimit të kryeqytetit dhe avancimit të standardeve të ndërtimit dhe sigurisë së qytetarëve, do themelohet drejtoria për Transformim dhe në krye të saj është emëruar arkitekti Ilir Murseli.
“Një çështje tjetër që po preokupon shumë qytetarët e Prishtinës dhe ende nuk i kemi dhënë zgjidhje, janë qentë endacak. Andaj, sot kam kërkuar nga drejtori për Siguri dhe Emergjenca që të ndryshojë gjendjen në mënyrë substanciale deri në fund të këtij viti. Siguria dhe mirëqenia e qytetarëve, për mua është një prej elementeve më të rëndësishme të qeverisjes.
Tutje i pari i Prishtinës ka treguar se procesi i transformimit të kryeqytetit kërkon punë e përkushtim të jashtëzakonshëm dhe se ky është një proces i gjatë në të cilin kërkohet konsistencë, vendosmëri dhe profesionalizëm.
Rama shkarkon nënkryetaren e Prishtinës nga radhët e PDK-së, Donjeta Sahatçiun
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
