Rusia po përgatit popullin për armët bërthamore, thotë Zelensky

Presidenti i Ukrainës, Volodymyr Zelensky paralajmëroi se zyrtarët rusë kanë filluar të “përgatisin shoqërinë e tyre”.

Kjo, për përdorimin e mundshëm të armëve bërthamore, por shtoi se nuk beson se Rusia është gati t’i përdorë ato.

Lajmi u bë i ditur nga multimediali britanik “BBC”, duke cituar intervistën me kreun e shtetit.

Duke folur në anglisht në zyrën e presidentit ukrainas, Zelensky shtoi se “ata po fillojnë të përgatisin shoqërinë e tyre dhe kjo është shumë e rrezikshme”.

“Ata nuk janë gati ta bëjnë këtë, ta përdorin. Por fillojnë të komunikojnë. Ata nuk e dinë nëse do ta përdorin apo jo. Mendoj se është e rrezikshme edhe të flasësh për të”, theksoi Zelensky.

Presidenti ukrainas mohoi sakaq që të ketë nxitur sulme ndaj Rusisë, duke pretenduar se një vërejtje e mëparshme ishte përkthyer gabimisht.

“Duhet të përdorni goditje parandaluese”, tha ai, duke iu referuar sanksioneve, “jo sulmeve”.

Gjatë javëve të fundit, ushtria ukrainase ka rimarrë pjesë të mëdha të territorit në një kundërofensivë të suksesshme.

Kjo fushatë ka detyruar trupat ruse që të braktisin pozicionet e mbajtura prej kohësh.

Presidenti rus Vladimir Putin dhe zyrtarë të tjerë të lartë rusë kanë sugjeruar se armët bërthamore – ndoshta më të vogla, armë taktike – mund të përdoren për të mbrojtur rajonet e aneksuara.

Zyrtarët perëndimorë thonë nga ana e tyre se nuk ka prova që Moska zyrtare është e përgatitur për ta bërë këtë.

Zelensky i bën thirrje NATO-s që t’i përgjigjet shantazhit bërthamor të Rusisë me një sulm parandalues

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.