Rusia ndihmon Iranin të lëshojë një satelit, shenjë e bashkëpunimit më të ngushtë

Një raketë ruse ka lëshuar ​​një satelit iranian në orbitë këtë të martë të 9 gushtit.

Kjo vjen si një shenjë e zgjerimit të bashkëpunimit midis dy vendeve përballë sanksioneve të rrepta perëndimore të vendosura ndaj të dyjave.

Raketa Soyuz që mbante në orbitë satelitin Khayyam u ngrit nga objekti i lëshimit të Baikonur nga Rusia në Kazakistan pak para orës 09:00 të mëngjesit.

“Ngritja e suksesshme e satelitit në interes dhe me urdhër të Iranit është bërë një moment historik i rëndësishëm në bashkëpunimin dypalësh ruso-iranian, duke hapur rrugën për zbatimin e projekteve të reja dhe akoma më të mëdha”.

Kështu ka thënë Yury Borisov, drejtor i përgjithshëm i Roscosmos.

Rusia ka kërkuar aleanca më të ngushta, duke përfshirë Iranin, pasi pushtimi i saj në Ukrainë e ka lënë të izoluar nga shumë vende perëndimore.

Përmes një deklarate, Irani ka thënë se sateliti nuk do të përdoret për aplikime ushtarake, siç kanë sugjeruar disa raportime mediatike.

Dhe se thashethemet për përdorimin e fotografive të satelitit për qëllime ushtarake janë të gabuara.

Sateliti, i pajisur me një kamerë me rezolucion të lartë, do të përdoret për programe bujqësore, burime ujore dhe aplikime të tjera mjedisore, sipas Agjencisë Iraniane të Hapësirës.

Agjencia ka treguar po ashtu se shkencëtarët iranianë e morën kontrollin e satelitit menjëherë pas lëshimit dhe se asnjë komb tjetër nuk do të kishte akses në informacionin e marrë.

Megjithëse negociatat në lidhje me nisjen i paraprinë pushtimit rus të Ukrainës, ato vijnë më pak se një muaj pasi Presidenti Vladimir Putin vizitoi Teheranin në përpjekje për të treguar se sanksionet perëndimore nuk kishin arritur të izolonin vendin e tij.

Irani ka përvojë të gjatë në shmangien e sanksioneve perëndimore.

SHBA-të kanë treguar se i ka ofruar Rusisë t’i shesë dronë për përdorim në Ukrainë dhe pajisje të tjera që përdorin teknologji që vendet perëndimore nuk ia shesin më Moskës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.