Rusia ka marrë presidencën e Këshillit të Sigurimit të OKB-së pavarësisht se Ukraina u kërkon anëtarëve të bllokojnë masën.
Secili nga 15 anëtarët e këshillit merr presidencën për një muaj, sipas një modeli të rradhës.
Herën e fundit që Rusia kishte presidencën, shkurt 2022, ajo filloi një pushtim në shkallë të plotë të Ukrainës.
Kjo do të thotë se Këshilli i Sigurimit po udhëhiqet nga një vend, presidenti i të cilit është subjekt i një urdhër-arresti ndërkombëtar për krime të dyshuara lufte.
Gjykata Penale Ndërkombëtare – e cila nuk është një institucion i OKB-së – lëshoi urdhër për Vladimir Putin muajin e kaluar.
Pavarësisht ankesave të Ukrainës, Shtetet e Bashkuara thanë se nuk mund të bllokonin Rusinë – një anëtare e përhershme e këshillit – nga marrja e presidencës.
Anëtarët e tjerë të përhershëm të këshillit janë Britania e Madhe, SHBA-të, Franca dhe Kina.
Roli është kryesisht procedural, por ambasadori i Moskës në OKB, Vasily Nebenzia, i tha agjencisë ruse të lajmeve Tass se ai planifikoi të mbikëqyrte disa debate, duke përfshirë një për kontrollin e armëve.
Ai tha se do të diskutonte një “rend të ri botëror” që, tha ai, do të “zëvendësonte atë unipolar”.
Ministri i Jashtëm ukrainas Dmytro Kuleba e quajti presidencën ruse “shakaja më e keqe ndonjëherë për Ditën e 1 Prillit” dhe një “kujtesë e ashpër se diçka nuk është në rregull me mënyrën se si funksionon arkitektura ndërkombëtare e sigurisë”.
Dhe në një koment të mëtejshëm të shtunën, ai e quajti atë “një shuplakë në fytyrë për komunitetin ndërkombëtar”.
Këshilltari presidencial i Ukrainës, Mykhaylo Podolyak, tha se masa ishte “një tjetër përdhunim i ligjit ndërkombëtar… një ent që zhvillon një luftë agresive, shkel normat e ligjit humanitar dhe penal, shkatërron Kartën e OKB-së, neglizhon sigurinë bërthamore, nuk mund të kryesojë organi kryesor i sigurisë në botë”.
Presidenti Volodymyr Zelensky bëri thirrje vitin e kaluar që Këshilli i Sigurimit të reformohet ose “të shpërbëhet tërësisht”, duke e akuzuar atë për dështimin për të ndërmarrë veprime të mjaftueshme për të parandaluar pushtimin e Rusisë.
Ai ka kërkuar gjithashtu që Rusia të hiqet nga statusi i saj anëtar.
Por SHBA-të kanë thënë se duart e tyre ishin të lidhura pasi Karta e OKB-së nuk lejon largimin e një anëtari të përhershëm.
“Fatkeqësisht, Rusia është një anëtare e përhershme e Këshillit të Sigurimit dhe nuk ekziston asnjë rrugë e mundshme ligjore ndërkombëtare për të ndryshuar këtë realitet”, tha sekretarja e shtypit e Shtëpisë së Bardhë Karine Jean-Pierre në një konferencë shtypi këtë javë.
Ajo shtoi se SHBA-të presin që Moska “të vazhdojë të përdorë vendin e saj në këshill për të përhapur dezinformata” dhe për të justifikuar veprimet e saj në Ukrainë.
Këshilli i Sigurimit i OKB-së është një organ ndërkombëtar përgjegjës për ruajtjen e paqes.
Pesë vende janë të përfaqësuara në mënyrë të përhershme në Këshillin e Sigurimit.
Ato pasqyrojnë strukturën e pushtetit të pasluftës që pati ndikim kur u formua këshilli.
Anëtarët e këtij grupi punojnë së bashku me 10 vende anëtare jo të përhershme.
Prania e Rusisë si një anëtare e përhershme në Këshillin e Sigurimit do të thotë se ajo mund të vërë veton ndaj rezolutës.
Për të kaluar një votim të Këshillit të Sigurimit, duhet të ketë nëntë vota pro, me asnjë nga pesë anëtarët e përhershëm që nuk votojnë kundër.
Në shkurt të vitit të kaluar Rusia vuri veton ndaj një rezolute që synonte t’i jepte fund pushtimit rus të Ukrainës (Kina, India dhe Emiratet e Bashkuara Arabe abstenuan të gjitha).
Në shtator ajo vuri veton ndaj një rezolute që bën thirrje për anulimin e aneksimit të paligjshëm të katër rajoneve të Ukrainës. Brazili, Kina, Gaboni dhe India abstenuan.
Marrë dhe përshtatur nga BBC për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
