Trupat ruse kanë hyrë në qytetin e rrethuar të Vuhledar, në rajonin e Donetskut.

Këtë e deklaroi guvernatori Vadym Filashkin, duke shtuar se luftimet po vazhdojnë dhe e përshkroi situatën si “jashtëzakonisht të vështirë”.

“Armiku tashmë pothuajse ka arritur në qendër të qytetit”, tha ai për televizionin publik.

“Ka luftime brenda qytetit – tha ai – kështu që është pothuajse e pamundur të sjellësh ndihma humanitare”.

Në mediat sociale janë shfaqur video që tregojnë ushtarë rusë duke valëvitur flamurin e vendit në çatinë e një pallati në qytet.

Videot me etiketa gjeografike sugjerojnë se një tërheqje e plotë e Ukrainës nga qyteti ka shumë të ngjarë.

Presidenti Volodymyr Zelensky dhe ushtria ukrainase nuk komentuan të martën mbi situatën në Vuhledar.

Ishte e paqartë nëse forcat ruse kontrollonin të gjithë qytetin.

“Vuhledar… qyteti për të cilin të gjithë luftuam, qyteti ku ushtarët nga njësi të ndryshme dhanë jetën, qyteti ku takova luftën me një armë në dorë”, tha Stanislav Buniatov, një bloger ushtarak ukrainas dhe një ushtar vullnetar.