Organizata Reporterët pa Kufij (RSF), ka thënë se 488 gazetarë dhe punëtorë të mediave janë të burgosur në shtete të ndryshme gjatë vitit 2021.
Ky numër paraqet shifrën më të lartë të gazetarëve apo punëtorëve në media, të arrestuar që nga koha kur RSF-ja ka filluar të publikoj raportin vjetor më shumë se 25 vjet më parë.
Arsyeja e arrestimit të gazetareve thuhet të jetë për shkak të punës së tyre e cila u rrit për 20 për qind, krahasuar me vitin 2020 për shkak të shtypjes së madhe të mediave në Mianmar, Bjellorusi dhe Hong Kong, bëhet e ditur përmes raportit vjetor për lirinë e mediave të publikuar më 16 dhjetor nga Reporterët pa Kufij.
46 gazetare janë vrarë gjatë këtij viti, ky është numri më i ulët që nga koha kur organizata me seli në Paris filloi të publikonte raportet vjetore në vitin 1995.
“Kjo shifër është rezultat kryesisht i “zbutjes së konflikteve” në Siri, Irak dhe Jemen”, shkruan tutje në raport.
Shtetet më të rrezikshme për gazetarët sërish mbesin Meksika dhe Afganistani, në të cilat u shënuan shtatë vdekje.
Shumica e sulmeve ndaj gazetarëve në Afganistan u kryen nga grupe lokale militante të ndërlidhura me grupin militant Shteti Islamik apo vetë talibanët derisa kryesit e këtyre sulmeve vazhdojnë të jenë “krejtësisht të pandëshkuar”.
Kina mbetet shteti me më së shumti gazetarë dhe punëtorë të mediave të burgosur për të pestin vit radhazi.
Aktualisht, 127 persona janë nëpër burgje për shkak të rritjes së kontrollit të Pekinit ndaj Hong Kongut, shkruan në raport.
Mianmari është shteti i dytë me 53 gazetarë të burgosur, i pasuar nga Vietnami me 43.
Në Bjellorusi janë 32 gazetarë të burgosur dhe punëtorë të tjerë të medive sikurse menaxherë, drejtorë, kontabilistë apo edhe avokatë, krahasuar me shtatë sa ishin vitin e shkuar.
Sipas organizatës, kurrë më parë nuk u regjistruan kaq shumë gazetare gra të burgosura kudo në botë me numrin total që arrin në 60. Ky numër është për një të tretën më i lartë sesa vetëm një vit më parë.
Po ashtu, sipas Reporterëve pa Kufij, 65 gazetarë dhe kolegë mbahen peng gjithandej.
Shumica prej tyre janë në Lindje të Mesme respektivisht Siri, Irak e Jemen përpos një gazetari francez që po mbahet në Mali.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
