Rritja e shpejtë e ChatGPT-së tërheq vëmendjen e ligjvënësve amerikanë

ChatGPT, chatbot-i i inteligjencës artificiale me rritje të shpejtë, ka marrë lëvdata për aftësinë për të shkruar përgjigjet shpejt për një gamë të gjerë pyetjesh.

Po ashtu ka tërhequr edhe vëmendjen e ligjvënësve amerikanë me pyetjet rreth ndikimit të tij në sigurinë kombëtare dhe arsimin.

ChatGPT u vlerësua të kishte arritur 100 milionë përdorues aktivë mujorë vetëm dy muaj pas nxjerrjes në treg, duke e bërë aplikacionin me rritjen më të shpejtë dhe një objektiv në rritje për rregullim.

Ai u krijua nga OpenAI, një kompani private e mbështetur nga Microsoft-i dhe u vu në dispozicion të publikut falas.

Sakaq, kudondodhja e tij ka krijuar frikë se inteligjenca artificiale gjeneruese si ChatGPT mund të përdoret për të përhapur dezinformata.

Dhe kjo vjen teksa arsimtarët shqetësohen se do të përdoret nga studentët për të mashtruar.

Ted Lieu, një demokrat në Komitetin e Shkencës të Dhomës së Përfaqësuesve, ka shkruar në një artikull se ai ishte i emocionuar për “mënyrat e pabesueshme që inteligjenca artificiale do të vazhdojë të avancojë shoqërinë”.

Por gjithashtu ai ka thënë se i trembet, pasi sfera e inteligjencës artificiale është lënë e pakontrolluar dhe e parregulluar.

Në janar, shefi ekzekutiv i OpenAI Sam Altman shkoi në Capitol Hill ku u takua me ligjvënës të orientuar nga teknologjia si Senatorët Mark Warner, Ron Wyden dhe Richard Blumenthal dhe përfaqësuesi Jake Auchincloss, sipas ndihmësve të ligjvënësve demokratë.

Një ndihmës i Wyden ka thënë se ligjvënësi i kërkoi Altman nevojën për t’u siguruar që inteligjenca artificiale nuk përfshin paragjykime që do të çonin në diskriminim në botën reale.

“Teksa senatori Wyden beson se inteligjenca artificiale ka një potencial të jashtëzakonshëm për të përshpejtuar inovacionin dhe kërkimin, ai është i përqendruar për të siguruar që sistemet e automatizuara të mos automatizojnë diskriminimin në proces”, ka shtuar Keith Chu.

Një ndihmës i dytë i Kongresit i ka përcaktuar diskutimet si të fokusuara në shpejtësinë e ndryshimeve të udhëhequra nga inteligjenca artificiale dhe se si mund të përdoren ato.

Nxitur nga shqetësimet për plagjiaturën, ChatGPT tashmë është ndaluar në shkollat në New York dhe Seattle.

Një ndihmës i Kongresit ka thënë se shqetësimi që ata po dëgjonin nga zgjedhësit vinin kryesisht nga arsimtarët.

“Ne nuk duam që ChatGPT të përdoret për qëllime mashtruese në shkolla ose kudo tjetër, kështu që po zhvillojmë masa zbutëse për të ndihmuar këdo që të identifikojë tekstin e krijuar nga ai sistem”, ka deklaruar kompania.

Shqiptarja Mira Murati, shefe e teknologjisë në OpenAI, ka thënë se kompania i ka mirëpritur të dhënat, duke përfshirë rregullatorët dhe qeveritë.

“Nuk është shumë herët që rregullatorët të përfshihen”, ka thënë ajo.

Vetë ChatGPT, kur u pyet se si duhet të rregullohet, u përgjigj “si një model neutral i gjuhës së inteligjencës artificiale, nuk kam një qëndrim për ligje specifike që mund ose nuk mund të miratohen për të rregulluar sistemet si unë”.

Por më pas vazhdoi duke renditur fushat e mundshme të fokusit për rregullatorët, të tilla si privatësia e të dhënave, paragjykimi dhe drejtësia, dhe transparenca në mënyrën se si shkruhen përgjigjet.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.