Autoritetet shëndetësore në Evropë, Shtetet e Bashkuara të Amerikës dhe Australi po hetojnë një shpërthim të fundit të rasteve të lisë së majmunëve, një sëmundje e rrallë virale e kufizuar zakonisht në Afrikë.
Zvicra ka raportuar të shtunën rastin e parë të virusit, duke u bërë vendi më i fundit evropian që identifikoi një shpërthim së bashku me Gjermaninë, Britaninë, Spanjën, Portugalinë, Francën, Italinë dhe Suedinë.
Mirëpo, sa rrezikohet Kosova nga kjo lije?
Infektologu, Arben Vishaj, në një bisedë për Albanian Post, sqaron se meqë kjo sëmundje përhapet dhe është ngjitëse edhe Kosova mund të jetë e rrezikuar, por që Klinika Infektive ka kapacitete për ta trajtuar.
“Po edhe Kosova është pjesë e botës dhe Evropës dhe si e tillë ka mundësi që të vinë njerëz që janë të infektuar por deri më tani nuk kemi pasur raste të tilla”, ka thënë ai.
Vishaj, bën të ditur se edhe pse Kosova nuk ka regjistruar raste të tilla, duhet të jenë më të vëmendshëm.
“Për momentin ne në Kosovë nuk kemi regjistruar raste të tilla, por, sido që të jetë vëmendja duhet të shtohet. Edhe qytetarët që kanë qenë në kontakt me të infektuarit në Evropën Perëndimore edhe vinë këtu në Kosovë duhet të kenë kujdes, nëse kanë simptome duhet që të paraqiten në Klinikën Infektive”, deklaroi Vishaj.
Ndërkaq, si njohës i sëmundjeve infektive e konsideron mjaft të çuditshme që një sëmundje e tillë është paraqitur edhe në Evropë.
“Sëmundja e lijës së majmuneve është një sëmundje e cila është karakteristike për Afrikën Qendrore dhe Perëndimore, këto ditët e fundit e kemi pasur të pranishme edhe në Evropën Perëndimore dhe në Amerikë dhe për këtë arsyeje institucionet të cilat merren me sëmundjet infektive kanë ngritur alarmin e mundësisë së përhapjes së sëmundjes infektive”.
Çka është sëmundja e lijës së majmunëve?
Sipas infektologut, Gëzim Morina, “lija e majmunit është sëmundje virale, zonotike që shfaqet kryesisht në zonat tropikale të Afrikës Qendrore dhe Perëndimore që i takon grupit ORTHOPOXIVIRUS të familjes POKSIVIRIDAE që janë dy variante”.
“Varianti i Kongos i cili është me i rëndë, me vdekshmëri 10 për qind dhe i dyti është varianti i Afrikës Perëndimore i cili është variant më i butë i cili ka vdekshmëri 1% të rasteve të prekura, fatmirësisht rastet e raportuara në Evropë i takojnë variantit të Afrikës Perëndimore”.
Morina, tutje bën të ditur edhe transmetimin e kësaj sëmundje.
“Transmetohet përmes kontaktit të ngushtë midis kafshëve: majmunit dhe më rrallë midis njerëzve. Bartja e infeksionit bëhet me kontaktin e ngushtë mes personit ose kafshës së infektuar me virus, ndërsa transmetimi nga njëri person në tjetrin bëhet përmes kontaktit të ngushtë me LEZIONE (puçrra, lëngje trupore, piklat e frymëmarrjes dhe materialet e kontaminuara si shtrati i pacientit si batanijet, peshairet, etj.)”.
Por, ai konsideron se tash ka një transmetim më të ndryshëm të kësaj sëmundje.
“Shfaqja klinike e sëmundjes është me ethe të vazhdueshme, dridhje, temperaturë të lartë, dhimbje koke, dhimbje muskujve(dhimbje e trupit), vjellje, skuqje dhe ënjte të nyejve limfatike që mund të çojnë deri te komplikimet mjaft serioze që mund ta sjellin edhe vdekjen e pacientit”.
Ndërsa kohëzgjatja e këtij virusi është 2 deri në 4 javë.
“Terapia Simptomatike bëhet vetëm në raste të infeksioneve sekondare bakteriale (jepen antibiotikë). Vaksinimi për lijen e madhe ofron mbrojtje edhe nga lija e majmunit. Por, janë zhvilluar vaksinat edhe më të reja që janë miratuar për parandalimin e lijes së majmunit”.
IKSHPK: S’ka raste të infektimeve me linë e majmunëve në Kosovë
Të hënën e 23 majit edhe Instituti Kombëtar i Shëndetit Publik ka bërë të ditur se asnjë rast nuk është raportuar në Kosovë deri tani.
IKSHPK-ja ka potencuar se po e përcjell me vëmendje situatën e krijuar, duke shtuar se “jemi në komunikim t vazhdueshëm me OBSH-në dhe ECDC-në, për vlerësimin e rrezikshmërisë dhe rekomandimeve për masat që duhet ndërmarrë për sëmundjen në fjalë”.
“Sa i përket furnizimit me vaksina për një sëmundje të tillë, IKSHP njofton se vaksina ende nuk është e disponueshme për distribuim dhe ekziston në botë vetëm vaksina kundër Variola Vera”, thuhet në njoftim.
Sa e rrezikshme është?
Rastet e lisë së majmunëve mund të jenë herë pas here më të rënda, me disa vdekje të raportuara në Afrikën Perëndimore.
Megjithatë, autoritetet shëndetësore theksojnë se nuk jemi në prag të një shpërthimi serioz dhe rreziqet për publikun e gjerë mbeten shumë të ulëta.
Autoritetet shëndetësore në MB, SHBA dhe Kanada u kërkuan njerëzve që po përjetojnë skuqje të reja ose janë të shqetësuar për linë e majmunëve të kontaktojnë ofruesin e tyre të kujdesit shëndetësor.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
