Rrëfimi i fotografit të pozës së Messit me Kupën e Botës, më e pëlqyera në historinë e Instagram-it

Lionel Messi qëndron i ulur mbi supet e Sergio Aguero-s, me të dyja duart lart, të shtrënguara fort pas trofeut të Kupës së Botës.

Në fytyrën e tij është e gdhendur buzëqeshja. Kurse sytë i shkëlqejnë.

Një moment gëzimi i pastër, i papërpunuar, kulmi i një ëndrre të përjetshme. E gjitha e kapur në një pjesë të sekondës.

Është një foto që Messi zgjodhi ta shpërndante për të festuar fitoren e tij në Kupën e Botës ndaj Francës.

Tanimë është postimi më i pëlqyer në historinë e Instagram-it.

Fotografia u kap nga fotografi Shaun Botterill, i cili kishte një ndenjëse në rreshtin e parë në një prej momentet më ikonike në historinë e sportit.

Sipas tij, fotografët në finalen e Kupës së Botës bënë një plan që njëri prej tyre të shkonte dhe të qëndronte në fushë përballë grumbullimeve pranë tribunës kryesore që mbante shumicën dërrmuese të tifozëve të Argjentinës në stadiumin Lusail.

Pasi Messi kishte kaluar ca kohë me familjen e tij pas prezantimit të trofeut, kapiteni i Argjentinës nisi të shkonte drejt tifozëve, duke bërë që fotografët të nxitonin drejt portës në atë fund të fushës.

“Thuajse u bllokova, por u bllokova në vendin e duhur”, ka treguar Botterill.

Ai e sheh atë moment si fat.

“Messi ishte aty dhe ai nuk lëvizte shumë, thjesht po i bënte të gjitha pjesët, me dy duar mbi trofeun”, ka treguar fotografi.

“Nuk e kishim idenë se çfarë do të ndodhte në fund. Ju mund të planifikoni për ngritjen e trofeut, por nuk mund të planifikoni për vrapimin dhe nuk e dini se sa kaotike do të jetë. Isha shumë afër tij, ndoshta maksimumi dy metra larg”, ka treguar ai.

Për të, e gjitha përbën një ndjenjë mjaft të çuditshme, pak surreale.

“Edhe duart e tij që ngrihen lart me trofeun, mendoj se mënyra se si ai e mban atë dhe buzëqesh, ai padyshim shijon një moment me tifozët”, ka vijuar ai.

Teksa Aguero e çoi mikun e tij në anën tjetër të tribunës, Botterill menjëherë rrëmbeu një kabllo nga një nga kamerat e largëta pas portës, e lidhi atë me kamerën dhe ia dërgoi foton redaktorëve të tij.

Fotografi pranon se prerja që Messi përdori në Instagram nuk ishte versioni i tij i preferuar i fotografisë, me pamjen më të gjerë që ofronte një kontekst më të madh dhe kapte më mirë admirimin që po merrte kapiteni i Argjentinës.

Edhe pas një karriere që filloi në Kupën e Botës 1986, Botterill ka treguar se këto momente ende duken surreale.

“Kur shikoj prapa, nuk mund ta besoj se ai djalë ishte para meje mbi shpatullat e Sergio Aguero-s, duke mbajtur Kupën e Botës, duke ua treguar këtë fansave të tij”, ka veçuar fotografi.

Si dikush që nuk ka një llogari në mediat sociale, Botterill ka treguar se fillimisht ishte plotësisht i pavëmendshëm për faktin se fotografia e tij kishte bërë histori.

Themeluesi i Facebook-ut, Mark Zuckerberg, konfirmoi se postimi i Messi-t në Instagram, i paraqitur nga fotografia e Botterill, kishte thyer rekordin për më shumë pëlqime në historinë e platformës.

“Kjo është gjë qesharake për mua sepse nuk jam në Instagram, nuk di as të pres një foto në Instagram”, ka thënë Botterill.

Pas 36 vitesh në industri, Botterill ende ndjen të njëjtin pasion dhe ekzaltim që kishte si një 18-vjeçar që sapo kishte filluar kur përpiqej të kapte momentet ikonike të sportit.

Pasi mbuloi Botërorin e tij të parë në vitin 1986 si redaktor, Botterill bëri një pushim në karrierë.

Madje hodhi poshtë mundësinë për të shkuar në Kupën e Botës 1990.

Iu kthye fotografisë për të mbuluar Kupën e Botës 1994 dhe që atëherë nuk ka bërë më pushim. Portofoli i tij artistik është i gjerë dhe përmban një sërë ngjarjesh kyçe.

Marrë nga “CNN”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.