Rrahja për një ‘hamburger’, që reflekton diskriminimin e shqiptarëve në Maqedoninë e Veriut dhe pse Asani zgjodhi fanellën kuqezi

Të flasësh sot për golat e bukur të lojtarëve shqiptarë në përfaqësime ndërkombëtare është bërë rutinë, ku në pesë raundet e fundit të “golave më të bukur” gjatë eliminatoreve EURO 2024, tre gola të kuqezinjve kanë rrëmbyer vendin e parë dhe një vendin e dytë.

Mbi të gjitha, prurjet e reja në kombëtare kanë qenë simbolikisht përbashkuese të trojeve shqiptare në rajon, me lojtarë tejet cilësorë, të bashkuar me Shqipërinë nga Kosova apo Maqedonia e Veriut.

Lidhur me këtë të fundit në fakt ka pasur rritje të përfaqësimeve në kombëtaren shqiptare e veçanërisht një rast, ai i Jasir Asanit, i cili po i bën të gjithë të ëndërrojnë një ikje në Gjermani me lojën e fortë dhe golat e bukur.

Tashmë 28-vjeçar, Asani i gëzohet një fame dhe suksesi të merituar. Por nuk është ar, gjithçka çfarë shkëlqen.

Një video e rikthyer pas në kohë, kur djaloshi shqiptar ishte 20 vjeç dhe luante për Vardarin në Maqedoninë e Veriut, ka sjellë reflektimin mbi diskriminimin që shqiptarët kanë pësuar ndër vite në vendin fqinj.

Por, ka rrëfyer në heshtje në mënyrë faktike edhe faktin se pse Asani, ka pritur 10 vjet për të marrë një ftesë nga kombëtarja shqiptare, kur fare mirë mund të luante për palën maqedonase.

Me thuajse 30% të popullatës shqiptare, Maqedonia e Veriut mundet t’ia lejojë vetes të ftojë djemtë shqiptarë për të qenë pjesë e kombëtares së tyre.

Megjithatë, rasti i Asanit pasqyrohet i tillë: I dhunuar sepse nuk tha “hamburger”!

Po, dhe nuk është habi diçka e tillë.

“Më thanë thuaj hamburger, i thash pse me thanë hamburger? Më rrahën shumë”, tregonte adoleshenti Asani asokohe, duke shpjeguar se 20 vetë – huliganë sa dihet nga rasti – i kishin dalë përpara dhe e kishin goditur, pasi ai nuk kishte pranuar të “bindej” ndaj presionit të tyre.

Çfarë e kishte shpëtuar nga rasti, ishte fakti se ai u kishte treguar se luante për Vardarin.

Një ngjarje shënjuese kjo në jetën e tij, e cila reflekton edhe diskriminimin që shqiptarët kanë pësuar në vendin fqinj.

Raportime të tilla ka pasur edhe mbi diskriminimin e popullatës shqiptare për t’u punësuar në administratë ndër vite.

Apo, edhe një rast i bujshëm në janar 2022, kur koloneli Muhaedin Bela, pjesë e Ushtrisë maqedonase dhe punonjës në Ministrinë e Mbrojtjes, bëri me dije se shqiptarët nuk janë të përfaqësuar sa duhet në strukturat udhëheqëse ushtarake, siç duhet të ishte në përputhje me ligjet e dala nga marrëveshja e Ohrit.

I tillë edhe rasti i Asanit, i cili kurdo mund ta kishte veshur fanellën verdhë e kuqe të Maqedonisë së Veriut.

Por, pritja e tij, shënjimi i rastit të dhunës dhe forcimi i një ndjesie kombëtare e atdhetare brenda vetes, pa e mohuar prejardhjen, janë shpërblyer sot, kur e gjithë shqiptaria po ia shijon golat dhe magjinë që ai sjell në jetë me këmbë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.