Rohde, Qeverisë: Merrni për bazë këshillat tona, s’jemi këtu për t’ju ndëshkuar

Ambasadori i Gjermanisë në Kosovë, Jorn Rohde, ka reaguar pas kritikave të artikuluar nga ana e Qeverisë së Kosovës drejtuar shteteve të QUINT-it, të cilët reaguan lidhur me një vendim të ekzekutivit për shpronësimin e tokave në pjesën veriore të territorit kosovar të banuar me shumicë serbe.

Lidhur me çështjen e shpronësimit të tokave në Veri, Rohde në një postimi në platformën sociale, X, ka cituar raportin e juristëve eminentë të Këshillit të Evropës për Kosovën, ku ndër të tjera theksohej se “kjo mënyrë e procedimit [me shpronësimin] nuk është në përputhje me sundimin e ligjit dhe ka të ngjarë të dëmtojë më tej besimin midis komunitetit serb dhe institucioneve qeveritare”.

“BE, OSBE, KiE, janë organizata në të cilat Kosova po përpiqet të bëhet anëtare. Për të vazhduar në këtë rrugë këshillat tona të përbashkëta duhet të konsiderohen, një gjë e tillë do të ju ndihmojë. Ne nuk jemi këtu për t’ju ndëshkuar, por për t’ju mbështetur”, ka shkruar ai.

Kritika e Bashkimit Evropian (BE) dhe shteteve partnere të QUINT-it rreth vendimit për shpronësimin e tokave kishte nxitur reagimin e ashpër të Qeverisë së Kosovës, duke konsideruar se aleatët e Kosovës konstatuan “në mënyrë të gabuar gjendjen faktike dhe bënë vlerësime ligjore të pabazuara në argumente”.

Në reagimin e ekzekutivit kosovar në lidhje me deklaratën e përbashkët të BE-së, QUINT-it dhe Organizatës për Siguri dhe Bashkëpunim në Evropë (OSBE) se ekzekutivi shkeli ligjet dhe rregulloret e veta për shkak të mangësive procedurale e teknike gjatë procesit, thuhej se shpronësimet vlerësohen nga ligjshmëria dhe jo nga etnia.

“Qeveria e Republikës së Kosovës shpreh keqardhje për Deklaratën e shteteve të QUINT-it, BE-së dhe OSBE-së lidhur me vendimin e datës 30 maj mbi shpronësimin e pronës së paluajtshme në disa komuna në veri të Republikës së Kosovës. Deklarata në fjalë, konstaton në mënyrë të gabuar gjendjen faktike dhe bën vlerësim ligjor të pabazuar në argumente”.

Gjithashtu, ekzekutivi kosovar shprehi “shqetësimin” që deklarata e aleatëve të Kosovës i referohet shpronësimit në disa komuna të Kosovës në Veri të vendit si komuna me shumicë serbe, duke vlerësuar se një referencë e tillë shkon kundër frymës dhe karakterit multietnik të kushtetutës së Kosovës.

“Komunat në Kosovë kanë emra të veçantë e përkatës dhe qeveria nuk u referohet si komuna me shumicë shqiptare, serbe, turke etj. pasi kjo nuk është në përputhje me karakterin multietnik të kushtetutës së Kosovës. Shpronësimet duhen vlerësuar për nga ligjshmëria, të drejtat e njeriut dhe interesi publik e jo për nga përkatësia etnike e qytetarëve”, thuhet në reagim.

Ambasada e Shteteve të Bashkuara (SHBA), Gjermanisë, Francës, Italisë dhe Britanisë së Madhe, por edhe zyra e BE-së dhe misioni i OSBE-së në Kosovë shprehën keqardhje që qeveria nën drejtimin e kryeministrit kosovar, Albin Kurti, s’ka pritur që të gjitha procedurat e hapura gjyqësore të përfundonin para se të merrte vendim për shpronësimin e tokave në veri.

Por, në një kundërpërgjigje, qeveria theksoi se “paditësit kanë ushtruar padi kundër vendimit preliminar për shpronësim duke pretenduar shkeljen e ligjit në procedurë”, por “gjykatat kanë gjetur se paditësit, përjashtimisht një numri të vogël të tyre, nuk kishin legjitimitet në procedurë”.

“Ligji në këtë rast është zbatuar njësoj si edhe në të gjitha rastet tjera të shpronësimit për interes publik anekënd Kosovës […] Ndërtimi i projekteve infrastrukturore, përfshirë këtu stacionet e policisë, do të ndihmojnë në parandalimin e dhunës, luftimin e krimit të organizuar dhe korrupsionit”.

Qeveria e Kosovës i cilëson “të gabuara dhe të pabazuara” kritikat e ndërkombëtarëve për shpronësimet në veri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.