Rohde paralajmëron pasoja për Listën Serbe nëse vazhdon me bojkotin e zgjedhjeve në Veri

Si një vendim të papërgjegjshëm e në dëm të interesave të komunitetit serb në Kosovë e ka cilësuar ambasadori i Gjermanisë në Kosovë, Jorn Rohde, vendimin e fundit të Listës Serbe – partia me mbështetjen më të madhe në mesin e komunitetit serb në Kosovë – për ta bojkotuar procesin e votimit për shkarkimin e kryetarëve të komunave në Veri.

Në një intervistë për Radio Televizionin e Kosovës, RTK, Rohde, ka vlerësuar se bojkoti nuk sjell zgjidhje të situatës.

“Në një shtet të së drejtës, nëse nuk ke një fuqi që të ndryshosh gjërat, bojkoti është më së paku i nevojshëm. Prandaj, ne i ftojmë të gjithë qytetarët dhe partitë politike në Veri që të bëjnë të pamundurën që të marrin pjesë në këtë proces dhe që ta përfundojmë atë”, tha ambasadori gjerman.

Rohde ndër të tjera ka potencuar se Lista Serbe duhet të marrë në konsideratë pasojat e mundshme nëse vazhdon me bojkotin.

“Qe 18 muaj kemi vetëm bojkote dhe kjo nuk është një politikë konstruktive. Qeveria e Kosovës e ka ofruar një proces demokratik për serbët në Veri dhe kjo ofertë duhet të pranohet nga serbët. Tash, ne, presim që ata ta pranojnë këtë. Nuk e kuptoj pse nuk duhet që të ndodhë kjo. Lista Serbe nëse thërret për bojkot atëherë duhet që të llogarisë edhe për pasoja”, ka deklaruar Rohde.

Listës Serbe të dielën paralajmëroi se s’do të marrë pjesë në referendumin që pritet të mbahet më 21 prill në katër komunat veriore të Kosovës, derisa fajësoi kryeministrin kosovar, Albin Kurti, duke shtuar se janë planifikuar procedura të pamundura për largimin e kryetarëve.

BE-ja në anën tjetër apeloi Listën Serbe që të rishqyrtojë vendimin për mospjesëmarrje në votimet për shkarkimin e kryetarëve në Veri të vendit, duke rikujtuar se pjesëmarrja e qytetarëve serbë që përbëjnë shumicën në pjesën veriore të Kosovës në jetën demokratike në Kosovë është në interes të tyre dhe një hap i nevojshëm për zbutjen e tensioneve.

Ndërkaq Shtetet e Bashkuara të Amerikë shprehën keqardhje që Lista Serbe nuk e përkrah votimin për shkarkimin e katër kryetarëve në Veri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.