Rohde kërkon që të ndalen sulmet politike ndaj Gjykatës Kushtetuese

Përveç shefit të zyrës së Bashkimit Evropian, Tomas Szunyog, që sulmet ndaj Gjykatës Kushtetuese të ndalen, një kërkesë të ngjashme e ka bërë edhe ambasadori gjerman Jorn Rohde.

Përmes një shkrimi në platformën ‘X’, Rohde ka thënë se Gjykata duhet të jetë e pavarur dhe e lirë nga ndikimi dhe presioni politik.

“Ndaj edhe këtu shqetësimin e kolegut tim të BE-së. Sundimi i ligjit nuk e hap as rrugën drejt Këshillit të Evropës e as Bashkimit Evropian! Mbështetja e Kosovës në rrugën e saj të integrimit evropian është e përzemërt, por edhe Kosova duhet të bëjë pjesën e saj”, ka shkruar Rohde.

Sharing my 🇪🇺's colleague's concern here as well. Rule of law "à la carte" does neither pave the way towards the @coe nor the European Union!
Supporting 🇽🇰 on its way of European integration is close to our heart, but Kosovo has to do its part as well. https://t.co/CsyyhJXWGI

— Ambassador Jörn Rohde (@GermanAmbKOS) January 24, 2024

Më 23 janar, shefi i Zyrës së Bashkimit Evropian në Kosovë, Tomas Szunyog, i shoqëruar nga Shefi i Misionit të Bashkimit Evropian për Sundim të Ligjit (EULEX), Giovanni Pietro Barbano të martën ka takuar Kryetaren e Gjykatës Kushtetuese, Gresa Caka Nimani.

Szunyog, njoftoi se me kryetaren e Gjykatës Kushtetuese kanë diskutuar edhe për pavarësinë e këtij institucioni.

“Theksova se Gjykata Kushtetuese duhet të jetë e pavarure dhe e lirë nga ndikimi dhe presioni politik. Për të ruajtur pavarësinë e gjyqësorit, është thelbësore Qeveria të përmbahet nga deklaratat që rrezikojnë të cenojnë autoritetin dhe pavarësinë e gjyqësorit, si dhe besimin e publikut në të”.

Ai ka shtuar se vendimet e Gjykatës Kushtetuese duhet të respektohen dhe të zbatohen plotësisht përfshirë edhe aktgjykimin e datës 19 maj 2016 për çështjen e Manastirit të Deçanit.

Raporti i organizatës ndërkombëtare, Transparency International (TI), për vitin 2022 i cili ishte publikuar në shkurt të 2023-ës, ka vlerësuar se Kosova ka bërë përparim në luftën kundër korrupsionit me 41 pikë, mirëpo pavarësisht kësaj shteti vazhdon të ketë ngecje të shumta.

Ky raport theks të veçantë i ka vendosur ndërhyrjes së pushtetit në sistemin e drejtësisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.