Rizvanolli: Mbi 9 mijë aplikime kemi pranuar për subvencionim të pajisjeve

Ministrja e Ekonomisë, Artane Rizvonolli, ka thënë se mbi 9 mijë aplikime janë pranuar për subvencionim të pajisjeve efiçiente për ngrohje.

Rizvanolli, përmes një shkrimi në rrjetin social ‘Facebook’ ka thënë se thirrja vazhdon të jetë e hapur.

“Për një muaj kemi pranuar 9253 aplikime për subvencionim të pajisjeve efiçiente për ngrohje. Thirrja vazhdon të jetë e hapur deri më 22.11.2023”, ka shkruar ajo.

Kryeministri i Kosovës, Albin Kurti, kishte bërë të ditur se Qeveria e Kosovës përmes Ministrisë së Ekonomisë gjatë vitit të fundit ka subvencionuar afro 10 mijë familje për të blerë pajisje efiçiente për ngrohje, ndërsa këtë vit ka dyfishuar buxhetin, me mbështetje të Bashkimit Evropian, në këtë fushë.\

Rreth dy javë më parë Ministria e Ekonomisë ka bërë lansimin e mbështetjes së konsumatorëve familjarë në investimin në pajisje shtëpiake efiçiente dhe sistemin diellor për ngrohjen e ujit sanitar.

Edhe ministri i Financave, Punës dhe Transfereve, Hekuran Murati, kishte thënë se mbi 16 mijë familje kanë aplikuar për subvencionimin e faturave të energjisë elektrike.

“Mbi 16 mijë familje kanë aplikuar deri më tani për subvencionim të faturave të energjisë elektrike. Aplikimi do të jetë i hapur deri në fund të muajit shtator, dhe mund të bëhet online në formularin: https://see.rks-gov.net”, ka shkruar ai.

Teksa u ka bërë thirrje familjeve që kanë të ardhura mesatare mujore më pak se 150 euro që të aplikojnë.

Po ashtu Bashkimi Evropian (BE), kishte mirëpritur vendimin e Qeverisë së Kosovës për subvencionimin e faturës së energjisë elektrike për konsumatorët që konsiderohen të cenueshëm siç janë personat me aftësi të kufizuara, nënat vetushqyese dhe pensionistët që jetojnë vetëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.