Rizvanolli: Mbi 1 milionë euro u kursyen përmes konfiskimit të pajisjeve për mihje të kriptovalutave

Si të arritur të vitit të kaluar ministrja e Ekonomisë, Artane Rizvanolli e ka paraqitur ndalimin e përdorimit të energjisë elektrike për mihje të kriptovalutave në Veri.

Ajo në komisionin për Ekonomi ka bërë të ditur se gjatë vitit 2022 janë konfiskuar gjithsej 600 pajisje për mihje të kriptovalutave.

“Gjatë kësaj periudhe të masave emergjente është ndaluar përdorimi i energjisë elektrike për mihje të kriptovalutave, aktivitet që zhvillohet në ekonominë e hirtë dhe mendoj që kjo ka pasur një efekt në të gjithë vendin”.

“Përfshirë këtu edhe në komunat në veri të Kosovës ku janë konfiskuar mbi 600 pajisje në tetë ferma të kriptovalutave të cilat gjatë vitit të kaluar janë shkatërruar në veri nga Policia e Kosovës në bashkëpunim me Doganën e Kosovës”, ka thënë Rizvanolli.

Ajo tutje ka sqaruar se në këtë formë konsumi i energjisë ka shënuar rënie.

“Kjo i ka kursyer Kosovës mbi 1 milionë euro çdo vit në kursimin e energjisë dhe së bashku me luftën ndaj fermave të drogës dhe aktiviteteve të tjera ilegale në veri kemi pasur ulje të konsumit të energjisë, përderisa viteve të kaluara kemi pasur rritje prej 14 për qind për çdo vit”, është shprehur Rizvanolli.

Më 22 shkurt, policia e Kosovës kishte kryer një aksion në Veri të Mitrovicës në tri lokacione, ku kishte konfiskuar drogë, armë dhe aparate të kripovalutave.

“Gjatë kontrollit në njërin prej lokacioneve, hetuesit kanë gjetur një pushkë automatike, dy fishekë, një radio për komunikim e njohur si Motorola, sasi të substancave narkotike si dhe katër aparate për kriptovaluta”, thuhej në njoftimin e policisë.

“Të gjitha gjësendet e gjetura janë konfiskuar në cilësi të provave materiale. Në lidhje me provat materiale, në cilësi të personit të dyshuar është duke u intervistuar një person mashkull kosovar”.

Ky aksion ishte kryer në konsultim me prokurorin, rastet armëmbajtje pa leje dhe posedim i substancave narkotike do të hetoheshin nga Drejtoria Rajonale e Policisë në Mitrovicë Jug, ndërsa aparatet për kriptovaluta ishin konfiskuar nga ana e policisë në veri dhe thuhej se do të procedohej tutje më këtë rast.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.