Lajme

Rivotimi në Luginë – Kamberi për Albanian Post: Po vërejmë presionin e strukturave shtetërore serbe


Shaip Kamberi

Procesi zgjedhor në fshatin Tërnoc të Bujanovcit ka filluar me kohë dhe pa probleme, por qysh në orët e para kanë filluar të vërehen presionet, ka thënë për Albanian Post, Shaip Kmberi, deputeti shqiptar, i cili po garon të futet në Parlamentin e Serbisë.

“Në afërsi të qendrës së votimit gjashtë, te shkolla, po shohim makina me tabela nga Vraja dhe qytete të tjera të Serbisë. Kjo për ne do të thotë se ka një interesim të madh të strukturave shtetërore, më saktësisht partive të cilat qeverisin me shtetin, për të bërë presion”, thotë Kamberi për AP.

“Sipas nesh, kjo është një formë presioni, por akoma nuk kemi regjistruar ndonjë parregullsi konkrete për të cilën duhet të ankohemi”, shton ai.

Ndërsa për prezencën e veturave të panjohura për komunitetin, deputeti Kamberi thotë se kanë njoftuar organet mbikëqyrëse të procesit zgjedhor.

“E kemi njoftuar zyrën e OSBE-së në Bujanovc, ata kanë marrë informacionet e duhura dhe kanë dalë në terren vetë. Komisionin Komunal Zgjedhor po ashtu e kemi njoftuar, dhe po presim, kaq mund të bëjmë”. Shprehet Kamberi.

Nga fillimi i këtij procesi zgjedhor e deri në ora 11:00, Kamberi thotë se nga 1 mijë e 100 votues, për të votuar kanë dalë 10% prej tyre.

“Këtu jeta e dita fillon pak ma vonë, jo në orët e hershme të mëngjesit, në Ternovc. Po presim, meqë sot është edhe e xhuma, pas xhumasë të ketë një fluks më të madh të votueseve që dalin”.

Por ky numër i votueseve është më i lartë se sa në zgjedhjet e 28 prillit.

“Krahasuar me zgjedhjet e fundit, kjo përqindje e votuesve në këtë orë është më e lartë, se ka qenë edhe muaj i Ramazanit edhe njerëzit shumë më vonë janë aktivizuar”, tregon Kamberi.

Ai është i bindur që nga ky proces zgjedhor i përsëritur në Tërnovc, të marrë votat e duhura që të jetë zëri i shqiptarëve në Kuvendin e Serbisë edhe për një mandat.

“Kemi biseduar me shumë njerëz, kemi përkrahje si asnjëherë më parë në zgjedhje, sidomos nga dita e djeshme, duke filluar nga presidenti i Shqipërisë, Kosovës, e partive politike dhe besoj që do të ketë një reflektim për të arrirë aty ku po pres”.

Por fokusin kryesor, Kamberi thotë ta ketë tek ruajtja e procesit zgjedhor, që të mos dëmtohet nga strukturat serbe.

Në këtë qendër votimi, procesi zgjedhor është duke u përsëritur për të tretën herë me radhë, pasi që Gjykata në Serbi kishte konstatuar disa shkelje, të cilat mund të kenë ndikuar në procesin zgjedhor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore