Rezultati i vizitave të shpeshta të Kurtit në Greqi, “thellimi i raporteve të Greqisë me Serbinë”

Ka shumë mundësi që prejse Albin Kurti është bërë kryeministër i Kosovës më shumë vizita ka pasur në Greqi, sesa në Norvegji ku i jeton familja (gruaja dhe vajza).

Të paktën nga njoftimet zyrtare, del se Kurti ka shkuar shtatë herë në Greqi në më pak se tri vjet (nuk ka të dhëna se ka udhëtuar drejt Norvegjisë shtatë herë).

Sa i përket krahasimit me vende të tjera, nuk është punë që bëhet. Kurti s’e ka vizituar as Shqipërinë aq shpesh sa Greqinë.

Të fundit herë, për të shtatën me radhë, ishte në tetorin e vitit të kaluar, ku udhëtoi për të marrë pjesë në panelin diskutues të organizuar nga The Economist.

Për ta realizuar këtë vizitë, ai kishte shmangur një nga takimet më të rëndësishme që po mbahej në Tiranë, ku u mblodhën liderët e Ballkanit Perëndimor në patronatin e Bashkimit Evropian.

Kurti sërish udhëton drejt Greqisë

Por, cili ishte rezultati i këtyre vizitave?

Sipas asaj që deklaron vetë kryeministri grek, Kyriakos Mitsotakis, “thellimi i raporteve me Serbinë”.

Mitsotakis po qëndron në Serbi në një vizitë zyrtare dhe në konferencë të përbashkët për media me presidentin serb, Aleksandër Vuçiç, ai përveçse tha që Greqia nuk e ndryshon qëndrimin për mosnjohjen e Kosovës, lëvdoi Serbinë si shtetin më të fortë të Ballkanit.

“Qëndrimi i Greqisë ndaj Kosovës mbetet i pandryshuar dhe dialogu për normalizimin e marrëdhënieve është e vetmja zgjidhje që Greqia e mbështet”, tha Mitsotakis, i cili theksoi se ky proces i normalizimit “do të ndihmonte veçanërisht në ruajtjen e stabilitetit në rajon”.

Në këtë konferencë me Vuçiç-in në Beograd, ku po qëndron në vizitë, Mitsotakis tha se dëshiron që t’i thellojë raportet me Serbinë, meqë, sipas tij, Serbia është shteti më i zhvilluar në rajonin e Ballkanit Perëndimor.

Kryeministri grek në Serbi: Qëndrimi për mosnjohjen e Kosovës mbetet i pandryshuar, duam t’i thellojmë marrëdhëniet me Serbinë

Ai shtoi se në Serbi ka ardhur “me një ekip më të madh ministrash sepse dëshirojmë të thellojmë bashkëpunimin dypalësh”.

Mitsotakis përsëriti atë që paraprakisht e tha Vuçiç se “Serbia është ekonomia më e fortë në Ballkanin Perëndimor”, derisa pohoi edhe se Greqia “mbështet Serbinë në rrugën e saj evropiane”.

Në anën tjetër, kur në një rast Kurti ishte pyetur për vizitat e shpeshta në Greqi, ai kishte deklaruar se është “afruar njohja nga Greqia”, por ishte demantuar nga Athina zyrtare që patën mohuar se ka ndryshim të qëndrimit, apo lëvizje në këtë drejtim.

Në këto vizita të shpeshta nga Kurti, ngjan që përfituesi i vetëm është “Tuv Hellas”, kompania greke që ka përfituar mbi 630 mijë euro në një nga tenderët e kundërligjshëm për të cilët është arrestuar, paraburgosur dhe po hetohet, kryeshefi i Korporatës Energjetike të Kosovës, Nagip Krasniqi.

Por, në kundërshtim me ligjin, pa ekzistuar specifikat e nevojshme, Nagip Krasniqi, kishte vendosur që të shpallë tender njëburimor, ku nuk hapet thirrja për të aplikuar kompanitë me oferta, por vetë KEK-u thërret një kompani të caktuar dhe me të, përmes negocimit të fshehtë, përjashton automatikisht të gjitha kompanitë e tjera që do të mund të aplikonin për tenderin.

Kjo ishte hera e parë që KEK-u për një shërbim të tillë të konsulencës po angazhonte një kompani përmes kësaj forme të tenderimit.

Dallaveret e Nagip Krasniqit – Si ia dha kundërligjshëm tenderin mbi 630 mijë euro kompanisë greke

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.