Italia është një vend me rrezik të lartë sizmik.
Referuar të dhënave të Rrjetit Kombëtar Sizmik, vetëm në vitin 2022 janë regjistruar 16 mijë e 302 goditje në territorin kombëtar dhe në zonat fqinje.
Tabloja gjeofizike, tashmë mjaft alarmante në vetvete, është bërë edhe më e ndërlikuar nga dendësia e lartë e popullsisë dhe pasuritë e paluajtshme të datuara.
74.1 për ind e ndërtesave janë ndërtuar para hyrjes në fuqi të legjislacionit aktual për sigurinë ndaj tërmeteve dhe për rrjedhojë nuk përputhen me standardet aktuale.
Nga gjithsej 12.2 milionë ndërtesa, flitet për 9 milionë. Në përgjithësi, Italia është vendi i Komunitetit Evropian me rrezikun më të lartë sizmik dhe një nga vendet më “të brishta” të industrializuara në botë.
Ndaj dhe ndërgjegjësimi i popullatës për rreziqet që lidhen me tërmetet është thelbësor.
Shpesh, në Itali priret të mbizotërojë një qëndrim pasiv: tërmeti nuk perceptohet si një kërcënim real dhe masat merren vetëm pas ngjarjeve, me episode të kujdesit të dobët gjatë projektimit, ndërtimit dhe kontrollit.
Por lëkundjet sizmike për nga natyra janë të paparashikueshme dhe mund të ndodhin edhe në zona që konsiderohen me rrezik të ulët. Dhe e vetmja zgjidhje efektive është promovimi i një kulture parandalimi.
Bërja progresive e ndërtesave ekzistuese të sigurta – përmes ndërhyrjeve strukturore që synojnë si banesat ashtu edhe strukturat civile – është një sfidë që i shqetëson të gjithë.
Shëndeti i brezave të ardhshëm dhe i botës së nesërme varet nga zgjedhjet e qëndrueshmërisë mjedisore që zbatohen në të tashmen.
Plani Kombëtar i Rimëkëmbjes dhe Rezistencës (Pnrr) ka akorduar burime të mëdha për të rizhvilluar ndërtesat si nga pikëpamja energjetike ashtu edhe nga pikëpamja sizmike nëpërmjet një sërë masash të bazuara në stimuj tatimorë.
Në total, një investim prej 13,95 miliardë eurosh është parashikuar për kapitullin e shpenzimeve në lidhje me këtë mision. Objektivi, deri në dhjetor 2025, është që të arrihet një rinovim i plotë i ndërtesave për të paktën 32 milionë metra katrorë dhe të paktën 3.8 milionë metra katrorë për qëllime antisizmike.
Masat Ecobonus dhe Sismabonus kanë lejuar zbritje tatimore deri në 110 për qind për ndërhyrjet që synojnë përmirësimin e efiçencës energjetike dhe sigurisë së ndërtesave.
Sismabonus, në veçanti, garanton zbritje si për ndërtimin nga e para ashtu edhe për sigurinë e ndërtesave të vendosura në bashkitë në zonat sizmike 1 dhe 2, të klasifikuara si shumë të rrezikshme. Por edhe në zonën 3 me rrezik mesatar deri në të ulët.
Ndërhyrje të veçanta janë planifikuar edhe për objektet publike, me një plan rindërtimi real, si dhe për sigurinë sizmike në objektet e kultit, me gjithë trashëgiminë kulturore që përmbajnë.
Disa kompani po ndërmarrin veprime për të inkurajuar këtë tranzicion, duke zhvilluar sisteme për ndërtimin, restaurimin dhe forcimin strukturor të ndërtesave.
Ky është rasti i Kerakoll, një grup lider në sektorin e ndërtimit të qëndrueshëm, i cili së fundmi nisi një test të veçantë antisizmik me Fondacionin Eucentre, Qendrën Evropiane për Trajnim dhe Kërkim në Inxhinierinë e Tërmeteve në Pavia.
Së bashku ata forcuan dy modele ndërtimi trekatëshe të betonit të armuar të mbushura posaçërisht, të ardhura nga një eksperiment i mëparshëm, njëri prej të cilëve ishte dëmtuar rëndë, duke iu nënshtruar një prove dinamike.
Gjatë provës u simulua tërmeti që goditi Irpininë në nëntor 1980. Vendimi për të riprodhuar një nga lëkundjet më të fuqishme të dekadave të fundit nuk ishte i rastësishëm dhe, për të verifikuar sigurinë, kushtet u sollën në ekstrem, pak para shembjes.
Rezultatet demonstruan sakaq efektivitetin e zgjidhjeve antisizmike të kompanisë, për kënaqësinë e madhe të të gjithë ekipit të punës, i cili, përveç studiuesve të Eucentre, përfshiu edhe profesorë nga Universiteti i Chieti-Pescara.
Është demonstrimi se si teknologjia antisizmike po bën hapa gjigantë, duke garantuar zgjidhje gjithnjë e më të besueshme për rizhvillimin e stokut ekzistues të ndërtesave.
Marrë nga “Corriere della Sera”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
