Rasmus Hojlund ose ‘Erling Haaland 2.0’

Nuk ka asnjë në futbollin botëror për momentin që të afrohet me Erling Haaland. Megjithatë një emër i ri duket se do e rivalizojë së shpejti norvegjezin.

Sulmuesi i ri i Atalanta-s, i quajtur Rasmus Hojlund, po merr shumë vëmendje në Serie A këtë sezon, me disa vëzhgues të bindur se 20-vjeçari është “Haaland 2.0”.

E tillë është zhurma rreth fenomenit të ri që Arsenal-i dhe Real Madrid kanë qenë të dy të lidhur me sulmuesin, i cili iu bashkua Atalanta-s vetëm verën e kaluar në një marrëveshje prej 15 milionë paundësh nga klubi austriak Sturm Graz.

Por pse kaq shumë njerëz flasin për Hojlund-in? Gjashtë gola në 22 paraqitje në Serie A, përfshirë dy asistime, nuk janë për tu anashkaluar për një 20-vjeçar në sezonin e tij të parë me një klub të ri.

Një nga njerëzit e parë që e krahasoi danezin, i cili tashmë ka përfaqësuar vendin e tij në nivel të lartë, me Haaland-in është trajneri aktual i Atalanta-s, Gian Piero Gasperini.

Italiani tha për sulmuesin e tij të ri se “Karakteristikat janë shumë të ngjashme (midis Hojlund dhe Haaland). Ai është një lojtar shumë i shpejtë, i bën 100 metra në më pak se 11 sekonda”.

“Jam i bindur se ai do të ketë një karrierë të shkëlqyer. Teknikisht, ai tregon gjithmonë gjëra të ndryshme dhe më të mira”, theksoi trajneri.

Sipas një raporti të kohëve të fundit, Real Madrid është kandidati kryesor për të nënshkruar me sulmuesin, pasi ka humbur Erling Haaland verën e kaluar.

Gazeta “La Republicca” sugjeron se “Los Blancos” mund të jetë në treg për një sulmues këtë verë, pasi fituesi i “Topit të Artë”, Karim Benzema po kalon në fazën e fundit të karrierës së tij.

Raporti gjithashtu thotë se Arsenal-i është i interesuar për Hojlund, megjithëse nuk ka asnjë sugjerim se sa do të kërkonte Atalanta për shitjen e lojtarit.

Koha do të tregojë nëse ndërkombëtari danez mund të vazhdojë të imitojë Haaland, por një gjë është e sigurt, ashtu si ylli i Manchester City-t, ai ka çdo atribut të nevojshëm për të qenë një sulmues i klasit botëror.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.