Rama pas mbledhjes me Qeverinë: Diskutuam për riorganizimin e procesit qeverisës

Kryeministri i Shqipërisë, Edi Rama, deklaroi pas përfundimit të mbledhjes dyditore të Qeverisë në Tepelenë se takimi me ministrat dhe zëvendës ministrat ka arritur disa rezultate të dobishme.

Lajmi u bë i ditur gjatë një konference për mediat.

“Besoj që kemi arritur disa rezultate të dobishme dhe kemi vendosur disa piketa të rëndësishme”, u shpreh fillimisht Rama. “Në mënyrë që sesionin e ri ta nisim me një puls të ri por edhe me një rritje të konsiderueshme të kapaciteteve qeverisë duke theksuar rolin edhe të zëvendës ministrave, duke përfshirë në vendimmarrje e procese të tjera drejtues të agjencive të rëndësishme”.

Rama ka shpjeguar më tej edhe përdorimi e fjalës “vetë-reformim” gjatë mbledhjes dyditore me kabinetin e ministrave.

“Vetë-reformimi është rikonceptim dhe riorganizim i procesit qeverisës në funksion të rritjes së eficencës dhe arritjes më të shpejta të rezultateve. Sot, Shqipëria është komplet diçka tjetër”, sqaroi ai.

Rama shtoi se autoritetet do krijojnë një kanal të ri ndërveprimi me ekspertizën vendase dhe të huaj me botën akademike, me organizatat ndërkombëtare.

Mbledhja

Kreu i Qeverisë bëri të ditur më herët mbylljen e ditës së parë të mbledhjes së zgjeruar të qeverisë.

“Sapo mbyllëm ditën e parë të mbledhjes së zgjeruar të qeverisë, me debate të dobishme dhe shumë material të vlefshëm për sezonin e ri”, shkruante kreu i Qeverisë në median sociale “Facebook”. “Reflektime dhe qarkullim mendimesh e idesh në prag të një sezoni të ri reformimesh dhe vetë-reformimi”.

Ai mblodhi më parë asamblenë e selisë rozë, nga ku miratoi edhe disa ndryshime të rëndësishme në fuqinë organizative të partisë.

Numri një i Qeverisë shkarkoi Damian Gjiknurin nga pozicioni i sekretarit të Përgjithshëm të PS-së, rol që e mbante që prej shtatorit të vitit 2021.

Tashmë sekretar i PS-së është Blendi Klosi, i cili pritet ta mbajë deri në shtator të këtij viti, kohë kur Asambleja do të mblidhet sërish, për të miratuar figurat e reja në sekretariat.

Gjiknuri i kalon Klosit detyrën e sekretarit të përgjithshëm: PS reflekton edhe pasi fiton

Po ashtu PS-ja tanimë ka edhe një kryetar të Grupit Parlamentar.

Blendi Çuçi, ish-ministri i Brendshëm, i cili u zëvendësua nga Taulant Balla, do të jetë kreu i ri Grupit të mazhorancës.

Në mbledhjen e Asamblesë, Rama theksoi se do të flasë për Qeverinë, kur kabineti të mblidhet.

Zërat kanë qenë të shumtë. Është aluduar për lëvizje të ndryshme.

Burime të Albanian Post thanë se ministrja e Financave dhe Ekonomisë, Delina Ibrahimaj, u shkarkua fillimisht nga kreu i Qeverisë.

Edhe pse ajo publikisht nuk e pranon, e as eprori i saj, kryeministri Edi Rama, në një “Jo” të thatë për mediat, kur pyetën lidhur me çështjen.

Vetë ministrja i komentoi si thashetheme vere lajmet e qarkulluara rreth shkarkimit të saj.

“Janë thashetheme vere, nuk jam shkarkuar as kam dhënë dorëheqjen”, tha ajo nën trysninë e gazetarëve.

Pavarësisht këtij komenti të ministres, Albanian Post i qëndron raportimit se ajo është shkarkuar nga detyra, të cilën e ushtronte prej dy vitesh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.