Rama para samitit: Në Piramidën e Diktatorit do të ulen armiqtë e tij të betuar, Shqipëria është gdhirë si “Evropa e Ballkanit”

Kryeministri i Shqipërisë, Edi Rama ka bërë dy vlerësime para fillimit të punimeve të Samitit të Procesit të Berlinit i cili do të organizohet në kryeqytetin shqiptar.

Fillimisht, sipas tij krerët evropianë do të vendosen në Piramidën e Diktatorit në Tiranë, ku do të ulen si “armiqtë e tij të betuar”.

Ndërsa lëvdon tryezën e Samitit të parë të Procesit të Berlinit jashtë kufijve të BE-së, ai shkruan se Shqipëria është gdhirë të hënën si “Evropa e Ballkanit”.

“Mirëmëngjes dhe me tryezën e Samitit të parë të Procesit të Berlinit jashtë kufijve të BE-së, në Piramidën e Diktatorit në Tiranë, ku do të ulen armiqtë e tij të betuar, të cilët e shohin me respekt e me vlerësim gjithnjë e më të lartë Shqipërinë, që sot është gdhirë si Evropa e Ballkanit, ju uroj një javë të mbarë”, shkruan kreu i Qeverisë në median sociale “Facebook”.

Me pjesëmarrjen e superfuqive evropiane dhe me prani të veçantë të kancelarit gjerman, Olaf Scholz, si edhe Presidentes së Komisionit Evropian, Ursula von der Leyen, forcimi i bashëpunimit rajonal mes gjashtëshes së Ballkanit Perëndimor dhe përafrimi me tregun evropian, do të jenë fjalë kyçe të Samitit dhe takimeve.

Të pranishëm pritet të jenë edhe krerë të tjerë shtetërorë, mes të cilëve ka konfirmuar praninë kryeministri spanjoll, Pedro Sanchez.

Rajoni ndërkaq pritet të përfaqësohet në nivele kryeministrore, ku më së shumti sytë janë nga Kosova dhe Serbia, me praninë e kryeministrit kosovar, Albin Kurti dhe homologes së tij serbe, Ana Brnabiç.

Nuk pritet megjithatë që të ketë diskutime lidhur me dialogun mes Kosovës dhe Serbisë në këtë Samit, duke qenë se agjenda është paracaktuar muaj më parë.

Nis bllokimi i rrugëve para Samitit të Tiranës, ndalohet kalimi në disa akse kryesore

Agjenda

Në orën 11:00 do të jetë pritja e liderëve, e cila do të pasojë me fjalën hapëse 30 minuta më vonë.

Në orën 12:00 nis sesioni i punës, integrimi i rajonit në tregun e përbashkët evropian dhe përmirësimi i konvergjencës me BE.

Në orën 13:30 fotografia familjare.

Më pas sesioni i dytë i punës do të nisë në orën 15:30, ku do të diskutohet mbi mbështetjen e tranzicionit të gjelbër dhe digjital në Ballkanin Perëndimor.

Në agjendë është parashikuar edhe përurimi i Kolegjit të Evropës në Tiranë.

Në orën 17:30 do të nënshkruhet marrëveshja rajonale për njohje reciproke të kualifikimit profesional.

E shumëpritur do të jetë konferenca e përbashkët për shtyp, që do të mbahet në orën 17:45.

E gjitha përfundon me ceremoninë e inaugurimit të Piramidës, në orën 18:30.

Masat policore

Ndërkaq Policia e Shtetit nëpërmjet një deklarate për mediat ka bërë me dije masat që do të ndërmerren në kuadër të samitit.

Kështu, Policia njoftoi se nga nesër do të nis rrethimi në rrugë në mënyrë që të ketë siguri për këtë event të madh që do të zhvillohet për herë të parë jashtë kufijve të BE-së.

Nëndrejtori i Përgjithshëm i Policisë së Shtetit, Sokol Bizhga, bëri të ditur se për mbarëvajtjen e këtij samiti do të jenë të angazhuar 1 mijë e 604 forca policore.

Policia shtoi se për garantimin dhe sigurinë e aktivitetit kemi bashkëpunuar me agjensitë e tjera të zbatimit të ligjit në vend dhe me agjenci ndërkombëtare.

“Po bashkëpunojmë me bashkinë e Tiranës, Autoritetin Portul të Rinasit, Policinë bashkiake, shërbimin zjarrfikës dhe qendrën spitalore të Tiranës”.

Kështu, rrugët që do të jenë të bllokuara janë bulevardi “Dëshmorët e Kombit” – ura e Dajtit deri te sheshi “Nënë Tereza”, bulevardi “Bajram Curri” nga kryqëzimi me rrugën e Elbasanit deri te kryqëzimi i rrugës Ibrahim Rrugova, Rruga Papa Gjon Pali II – ETC – RTSH – stadiumi, rruga Ismail Qemali deri te rruga e Elbasanit, rruga Mustafa Matohiti.

Në këto akse rrugore, duke filluar nga ora 20:00 e datës 15 tetor deri në datën 16 në orën 11:00, do të ndalohet parkimi dhe qarkullimi i automjeteve por do të lejohet qarkullimi i qytetarëve që janë rezident në ambientet e banimit brenda këtij perimetri sigurie.

Sipas Bizhgës, në këto zona do të lejohet vetëm qarkullimi në këmbë i banorëve rezidentë.

Ndërsa në rrugën “Papa Gjon Pali II” nuk do të lejohet as qarkullimi i këmbësorëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.