Kryeministri i Shqipërisë, Edi Rama konsideron se nuk është thyer asnjë etikë me lajmërimin e Ministrisë për Evropën dhe Punët e Jashtme, e cila njoftoi nisjen e procedurës për zëvendësimin e ambasadores Yuri Kim.
Lajmi u bë i ditur gjatë një konference për mediat, pas mbledhjes me drejtuesit e qarqeve.
“Nuk është thyer asnjë etikë e asnjë lloji dhe procesi për zëvendësimin e ambasadores ka nisur siç është thënë nga Ministria e Jashtme. Natyrisht, nuk e kemi nisur ne procesin, e ka nisur Departamenti i Shtetit, si për të gjithë ambasadorët, kur bëhet fjalë për ambasadorët e SHBA-ve”, theksoi Rama.
Ndër të tjera, kreu i qeverisë sqaroi se marrëdhëniet mes tij dhe Kim janë “më të forta se kurrë”.
“Nuk ka asnjë problem, ne kemi pasur dje një takim të gjatë, konstruktiv, miqësor, nuk ka asnjë problem. Domethënë, kush e shpreson krisjen, gabon”, vijoi kryeministri.
Departamenti Amerikan i Shtetit iu kundërpërgjigj me shumë diplomaci Ministrisë për Evropën dhe Punët e Jashtme në Shqipëri, e cila njoftoi nisjen e procedurës për zëvendësimin e ambasadores Yuri Kim.
Në një përgjigje të shkurtër për Albanian Post, zëdhënësi i DASH-it vëren se procesi i nominimit i takon vetëm Shtëpisë së Bardhë.
“Ambasadorët e SHBA-ve përzgjidhen dhe shërbejnë sipas dëshirës së Presidentit të Shteteve të Bashkuara”, thekson departamenti.
Shtëpia e Bardhë nuk iu përgjigj menjëherë kërkesës për koment nga Albanian Post.
“Në përgjigje të interesimeve të medias gjatë gjithë ditës dhe për të shmangur çdo spekulim mbi ‘heshtjen’ e MEPJ-së, konfirmojmë se procedura e zëvendësimit të ambasadores Kim ka nisur zyrtarisht”.
Ky ishte njoftimi zyrtar i 8 dhjetorit që e nxorri tërësisht institucionin e diplomacisë shqiptare nga korniza e kompetencave të saj.
Jo pak reagime erdhën nga figura të ndryshme të politikës dhe diplomacisë, të cilët e evidentuan rastin si një “skandal diplomatik”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
