Kryeministri i Shqipërisë, Edi Rama ndodhet në Spanjë në takimin e Këshillit të Internacionales Socialiste.
Ka qenë vetë kreu i qeverisë i cili ka ndarë disa foto në rrjetin social Facebook.
“Në takimin e Këshillit të Internacionales Socialiste ku nën udhëheqjen e Presidentit të IS, kryeministrit të Spanjës Pedro Sánchez, morëm një sërë vendimesh të rëndësishme”, shkruan Rama.
Kujtojmë se kryeministri shqiptar zhvilloi të martën e 23 janarit një vizitë dyditore në Spanjë, ku turizmi ishte qëllimi kryesor i takimeve të tij.
Një të tillë, e ka pasur edhe me homologun e tij spanjoll, Pedro Sanchez.
Sa pati mësuar Albanian Post, Rama shoqërohej në këtë vizitë nga ministrja e Turizmit dhe Mjedisit, Mirela Kumbaro, si edhe nga kryetarët e bashkive Durrës, Lezhë, Sarandë dhe Gjirokastër.
Shqipëria pritej që të prezantojë në këtë ngjarje të rëndësishme për turizmin, modelin e saj të diversitetit turistik nën kornizën e zhvillimit të qëndrueshëm dhe në harmoni me mjedisin.
Nën sloganin “Albania, all you need is here”, Shqipëria synon tërheqjen e vizitorëve përmes shembullit të praktikave pozitive e të qëndrueshme në turizëm që promovojnë destinacone të turizmit natyror, prodhuesit lokalë, traditat e lashta, produktet artizanale e mikpritjen shpirtërore.
Spanja është një nga vendet lider në botë për turizmin dhe vendi i dytë më i vizituar në Evropë nga turistët e huaj tashmë prej vitesh.
Me një tipologji të njëjtë të tërheqjes së turistëve, duke kombinuar plazhet e bukura me natyrën dhe kulturën, “mentorshipi” i Spanjës për të bërë që Shqipëria të rrisë aftësinë e saj thithëse të turizmit mund të jetë tejet i volitshëm për vendin ballkanik.
Po ashtu, në vitet e fundit, është parë një numër shumë i madh dhe në rritje i turistëve spanjollë në Shqipëri, duke llogaritur edhe se për të parën herë, toka e shqiponjave është vizituar nga mbi 10 milionë turistë, gjatë 2023-shit.
Po ashtu, edhe rreth kalimit nga një vend me kryesisht turizëm veror në një vend me 365 ditë turizëm, mund të shohë të arsyeshme marrjen e eksperiencave nga Spanja lidhur me politikat që duhen ndjekur për ta kthyer Shqipërinë në vendmbërritje madhore turistike.
Lajmi në përditësim
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
