Rama në Gjirokastër: Priten të shpallen fituesit e aeroportit të Vlorës dhe Kukësit

Në qytetin e Gjirokastrës Kryeministri i Shqipërisë, Edi Rama, i shoqëruar nga Ministri i Brendshëm, Bledi Çuçi, zhvilloi një bashkëbisedim me qytetarët.

Investimet në qarkun e Gjirokastrës

Çuçi tha se janë investuar 100 milionë euro ndërhyrje të drejtpërdrejta, pa llogaritur infrastrukturën. “Sot themi me gojën plot që qarku i Gjirokastrës ka një ofertë të qëndrueshme për zhvillim të qëndrueshëm.”

Falë investimeve që do të kryhen e gjithë Labëria do të lidhet me rrugë, më parametra bashkëkohorë. Edhe Përmeti po lidhet me Ersekën. Ka filluar investimi për rrugën e Çarshovës.

“Turizmi është i vetmi aset që ky qark ka nëse do të zhvillohet dhe të kthehet në ditët e veta të lavdishme”.

Gjatë bashkëbisedimit me qytetarët Rama tha se distanca nuk është pengesë për të pasur një zhvillim të drejtpërdrejtë të hapur me qeverinë. Ai i ftoi qytetarët të ndanin shqetësimet e tyre.

“Qeveria nuk ka një shkop magjik. Na duhet të punojmë pa u ndalur, përballë vështirësive”, pohoi Rama.

Kryeministri tha se vendi u përball me dy goditje të mëdha. Ai shtoi se tërmenti e vendosi qeverinë përpara domosdoshmërisë, ndërsa pandemia na vuri përballë sfidës së jetës dhe kostove të rënda në shëndetin e njerëzve..

“Ka shumë për të bërë. Koha nuk pret në sensin e viteve që kemi kaluar. Rruga është e duhura. Drejtimi është i duhuri. Duhet vetëm të këmbëngulim“, deklaroi kryeministri.

Gjatë bashkëbisedimit në Gjirokastër, Rama tha se nëse do të kthejmë kokën pas në 6-7 vite më parë dhe do të kujtohemi ku ishte Gjirokastra.

Kreu i qeverisë u shpreh se ankthi i pasurive të trashëguara prej kaq shumë brezash, përjetimi i dramës do të ishte më i madh. Numri i vizitorëve ishte shumë i vogël. Njerëz që vinin dhe flinin në Gjirokastër ishin shumë pak, pasi faktikisht nuk kishin ku të flinin. Kjo pasuri ishte në rrënim të vazhdueshëm dhe jo në funksion të familjeve. Vetëm në perimetrin e pazarit kemi mbi 700 shtretër në dispozicion të vizitorëve.

Marrëveshja me qeverinë turke

Rama tha se gjatë vizitës së fundit ka nënshkruar një marrëveshje me qeverinë turke për objektet e trashëgimisë kulturore.

“Kemi bërë një marrëveshje me qeverinë turke për të investuar në mënyrë të konsiderueshme te objektet e trashëgimisë kulturore. Turqia i ka kapacitetet financiare për të na dhënë një dorë. Tanimë janë bërë ndërhyrje nëpërmjet  Agjencisë Turke për Bashkëpunim dhe Koordinim (TIKA). Kemi rënë dakord për Gjirokastrën dhe Beratin. Besoj që qeveria shqiptare dhe qeveria turke do të bëjë ndërhyrje”.

E gjithë qendra historike do të jetë këmbësore. Lidhur me turizmin kjo është vlerë e shtuar.

Pagat

Lidhur me pagat kryeministri Rama tha se që pagat do të rriten duke rritur investimet, duke luftuar informalitetin, duke zgjeruar bazën fiskale.

“Do të kemi një rritje të mëtejshme të të ardhurave si një rezultat i sistemit të fiskalizimit. E kemi nisur me një bazë të ardhurash 21%, ndërkohë që vendet në rajon e kanë 23%, 25%, 27%. Tanimë e kemi në 27%. Do ta kemi në 30% prodhimin e përgjithshëm”, tha ai.  Gjatë bisedës nuk munguan edhe batutat për Bashën apo gjirokastritët.

Ndërtimi i aeroportit të Vlorës dhe të Kukësit

Gjatë bashkëbisedimit me qytetarët, kryeministri tha se këto ditë pritet të shpallen fituesit e garës ndërkombëtare për ndërtimin e aeroportit të Vlorës dhe të Kukësit.

“Shpresoj që këto ditë të kemi fituesin e garës ndërkombëtare që u bë si legjenda e Rozafës, pandemia, hapje-mbyllje, kredia, etje. Këtu në Gjirokastër bëhet fjala për dy aerodrome, që do të jenë turistike”, shtoi Rama.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.