Rama mendon për sezonin e ardhshëm turistik: Rreziku që nami i madh të na kthehet në “boomerang” është real

Kryeministri i Shqipërisë, Edi Rama ka bërë thirrje nga të gjithë aktorët publikë dhe privatë që të mobilizohen për sezonin e ardhshëm turistik.

Lajmi u bë i ditur gjatë një bilanci të sezonit turistik veror me kryebashkiakët dhe zyrtarët qeveritarë.

“Faktikisht, bumi turistik i këtij viti, përtej të gjithë efekteve të jashtëzakonshme pozitive na vuri përpara sfida të mprehta që ne duhet të fillojmë t’i adresojmë menjëherë. Nga ana tjetër duhet të jemi të gjithë të vetëdijshëm dhe këtu kam parasysh të gjithë nivelet e qeverisjes por edhe sektorin e sipërmarrjes në turizëm se rreziku që gjithë ky ‘nam i madh’ dhe i mirë kudo në botë i këtij viti të kthehet në ‘boomerang’ në vitin në vijim apo në dy-tre vitet në vijim është real”, argumentoi kreu i Qeverisë.

Sipas tij, autoritetet do duhet të jenë të përgatitura pasi vitin tjetër, interesi do të sjellë shumë më tepër kërkesë.

“Them ‘boomerang’ nëse ne nuk do të jemi të përgatitur për të përballuar një kërkesë që padiskutim do të jetë më e madhe vitin e ardhshëm sepse impakti i gjithë këtij pasqyrimi global mediatik të kësaj surprize të quajtur Shqipëri këtë vit do të rrisë interesin dhe do të sjellë shumë më tepër kërkesë vitin e ardhshëm”, theksoi Rama.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.