Rama: Kongresi Amerikan nuk po mbështet “aq sa do të dëshironim” mbrojtjen tonë kibernetike

Kryeministri shqiptar Edi Rama pohoi se Kongresi Amerikan nuk po e mbështet plotësisht forcimin e mbrojtjes kibernetike të Shqipërisë.

Lajmi u bë i ditur gjatë Forumit Publik të NATO-s në bashkëbisedimin me Rachel Rizzo, anëtare e lartë jorezidente në Këshillin Atlantik.

“Ne po përpiqemi të bëjmë gjithçka për të forcuar mbrojtjen tonë kibernetike, por nuk është shumë e lehtë. Ata (Kongresi Amerikan – ed.) nuk po e mbështet plotësisht atë aq sa do të dëshironim, le të themi”, theksoi kreu i Qeverisë.

Departamenti Amerikan i Shtetit prej kohësh është në bisedime aktive me Kongresin Amerikan për krijimin e kanaleve zyrtare për të ndihmuar vendet e huaja të parandalojnë dhe të rimëkëmben nga sulmet kibernetike dhe të zhvillojnë teknologjitë në zhvillim.

“Ne jemi në një bisedë të dyanshme për këtë tani”, zbuloi Nathaniel Fick, ambasadori për Byronë e Hapësirës Kibernetike dhe Politikës Dixhitale të Departamentit të Shtetit. “Përpjekja do të përfshijë një fond të dedikuar për mbështetjen e teknologjisë, si dhe forma të tjera të ndihmës”.

Në muajin mars Shtëpia e Bardhë njoftoi se do të sigurojë 25 milionë dollarë për Kosta Rikën për të ndihmuar atë vend të rimëkëmbet nga një sulm i dëmshëm i ransomware i lidhur me Iranin.

Administrata Biden dha një grant të ngjashëm prej 25 milionë dollarësh për Shqipërinë në vazhdën e një sulmi shkatërrues ndaj qeverisë së atij vendi vitin e kaluar, i cili u është atribuar hakerëve iranianë.

Fick tha se mekanizmi ekzistues i ndihmës amerikane “nuk është i arkitekturuar” për çështje të tilla, veçanërisht për sigurinë kibernetike.

“Nuk ka atë lloj fleksibiliteti që ju nevojitet për të adresuar çështjet kibernetike”, tha ai. Për shembull, “shumë dollarë ndihme në fakt nuk janë në gjendje të mbështesin organizatat ushtarake ose të zbatimit të ligjit. Kjo është një sfidë në hapësirën e sigurisë kibernetike kur ato janë pikërisht organizatat që zotërojnë ato aftësi në vendet partnere ku ne mund të dëshirojmë të ndihmojmë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.