Rama e quan “frikacak” kërcënimin e Rusisë për përdorimin e armëve bërthamore

Kërcënimi i Rusisë për përdorimin e armëve bërthamore kundër Ukrainës është “frikacak” dhe “krejt i çmendur”.

Kështu deklaroi kryeministri shqiptar Edi Rama gjatë një interviste për agjencinë japoneze “Kyodo News”.

Deklarata e presidentit rus Vladimir Putin se vendi i tij do të vendosë armë bërthamore taktike në Bjellorusi, fqinjin dhe aleatin e saj, është “një mënyrë frikacake për të kërcënuar dhe shantazhuar Perëndimin, jo vetëm Ukrainën”, tha kreu i Qeverisë shqiptare.

Komenti i Putinit në një intervistë në televizionin shtetëror të 25 marsit ishte sinjali më i fundit i tij për përdorimin e mundshëm të armëve bërthamore, gjë që ka shkaktuar shqetësim global.

Udhëheqësi shqiptar tha gjithashtu se kontrolli i Rusisë mbi termocentralin bërthamor Zaporizhzhia, më i madhi në kontinent, në Ukrainën jugore pasqyron gjithashtu frikacakërinë dhe dobësinë e Moskës.

Rama, i cili vizitoi vendin përkujtimor të bombës atomike në qytetin japonez të Hiroshimës në shkurt, tha se u lut që përdorimi i armëve bërthamore të mos përsëritej.

“Asnjë qëllim, asnjë ambicie, asnjë arsye, asnjë justifikim nuk mund të gjendet në mendjen e shëndoshë për përdorimin e armëve bërthamore”, shtoi ai.

Ndërsa lufta hyn në muajin e saj të 14-të, kryeministri tha se vendet demokratike do të vazhdojnë të mbështesin Ukrainën.

Ata nuk mund “të lejojnë Vladimir Putin të pushtojë një vend tjetër pa rezistencë…dhe të zhgënjejnë Ukrainën”, u shpreh Rama, duke shtuar se Perëndimi gjithashtu “po mbron veten”.

“Ndikimi i luftës në sigurinë e Evropës, përfshirë Shqipërinë, mund të jetë shumë i madh në rast se lufta shkon keq”, tha ai. “Nëse Putin ia del mbanë në lojën e tij të rrezikut, atëherë gjithçka do të ndryshojë”.

Rama kritikoi gjithashtu Iran-in për furnizimin me dronë sulmues të përdorur nga Rusia në luftë.

Ai vlerësoi Japoninë për punën me Perëndimin për çështjet e sigurisë.

Duke e quajtur Japoninë një “mik të madh”, Rama nënvizoi gjithashtu se Shqipëria dëshiron të punojë me të për çështjet e sigurisë kibernetike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.