Rama dorëzon letrën e interesit për anëtarësimin në mekanizmin e Mbrojtjes Civile të BE-së

“Anëtarësimi i Shqipërisë në mekanizmin e Mbrojtjes Civile të Bashkimit Evropian është një hap shumë domethënës, por edhe një lehtësim i madh për ne, po të kemi parasysh nevojat që kemi”.

Kështu u shpreh kryeministri i Shqipërisë, Edi Rama, në një konferencë të përbashkët për mediat, pas takimit me komisionerin e Bashkimit Evropian për menaxhimin e krizave, Janez Lenarčič, ku ka shprehur falënderimin për mbështetjen e unionit gjatë tërmetit shkatërrues të vitit 2019.

Gjatë konferencës, Rama i dorëzoi letrën e interesit nga Shqipëria për anëtarësimin e vendit në mekanizmin e Mbrojtjes Civile të BE-së me firmën e ministrit të Mbrojtjes.

“Reformimi i sistemit të mbrojtjes civile është në proces, në rang kombëtar, sigurisht edhe si bashkërendim në nivel evropian”, tha Rama gjatë fjalës së tij.

Sipas Ramës, ky mekanizëm i ka shërbyer dhe i është përgjigjur vendit tonë në raste krizash. Përveç tërmetit, këtu Rama përmendi dhe zjarret që “mbërthyen” malet verën e kaluar dhe mbërritja e aeroplanëve nga shtete si Holanda dhe Republika Çeke.

Po ashtu ai përmendi dhe rastin e fundit, ku ishulli i Sazanit u përfshi nga flakët dhe avioni grek ndihmoi në shuarjen e e vatrave të zjarrit.

“Evropa këtë mekanizëm e ka ngritur në funksion të domosdoshmërisë për ta përballuar, së bashku ndryshimin e klimës dhe pasojat e ndryshimit të klimës pikërisht në mjedisin tonë”, vijoi Rama në fjalën e tij.

Ndër të tjera, ai u shpreh se “jo vetëm do të marrim, por shteti ynë ka edhe për të dhënë në raste krizash te një shtet tjetër”.

I pyetur rreth kësaj se çfarë ka Shqipëria për t’i dhënë këtij mekanizimi, Rama u shpreh i qartë: ne kemi bërë ndryshim kolosal të strukturës të mbrojtjes civile.

Ndërsa shtoi se Komisioneri do të vizitojë qendrën e Koordinimit, për të parë nga afër kapacitetet zhvilluese të vendin tonë.

“Ky mekanizëm është ndërtuar nga vendet e BE-së, për të përballuar së bashku momente kritike. Që do të thotë, kur flasim për zjarr që bie dhe jep përmasa për një sërë arsyesh e për këtë në Shqipëri vjen një apo dy apo tre mjete nga ky mekanizëm”, tha kreu i qeverisë shqiptare.

Nga ana tjetër, Komisioneri u shpreh se, përveç 27 vendeve anëtare të unionit, pjesë e këtij mekanizmi janë dhe gjashtë vende të tjera jo anëtare.

Ai renditi këtu Islandën, Norvegjinë, Turqinë, Serbinë, Maqedoninë e Veriut dhe Malin e Zi. Ndërsa shprehu ngazëllimin për aplikimin e Shqipërisë për t’u bashkuar.

“Disa shtete mungojnë dhe njëra prej tyre është Shqipëria. E pranoj këtë kërkesë zyrtare”, tha ai, ku i dorëzoi Ramës një manual për domethënien e këtij mekanizmi.

Duke vënë theksin te solidariteti, i cili është dhe qëllimi i këtij mekanizmi, Lenarčič u shpreh se, “e mbështes, që Shqipëria të ketë mundësi të japë kontributin e sajt kur ka nevoja”.

Komisioneri u pyet për fondet e rindërtimit nga tërmeti dhe mënyra sesi janë shpenzuar. Ai u përgjigj se BE-ja, falë këtij mekanizmi, i ka dhënë Shqipërisë 75 milionë euro dhe “janë shpenzuar mirë”.

“Nesër në mëngjes unë do të shkoj për vizitë në disa struktura që janë financuar nga BE-ja për rindërtim. Do të shkoj në një kopsht në Durrës”, u shpreh ai.

Sipas tij, nga ky fond kanë përfituar 11 bashki në rang vendi dhe janë 20 mijë nxënës dhe mësues, ku sipas tij përfitojnë nga kjo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.