Shqipëria

Radha kilometrike në Kakavijë, Meta: E papranueshme, qeveria të marrë masa


Kryetari i Partisë së Lirisë, Ilir Meta ka reaguar lidhur me trafikun e rënduar në pikën kufitare të Kakavijës duke i bërë thirrje qeverisë që të kontaktojë me palën greke për të vendosur në funksion disa sportele.

“Çdo qytetar shqiptar meriton të trajtohet me dinjitet, jo si njeri pa shtet dhe pa atdhe! I bëj thirrje urgjente Qeverisë dhe Ministrisë për Evropën dhe Punët e Jashtme, të vendosin menjëherë kontaktet me palën greke, për të marrë të gjitha masat efektive për lehtësimin dhe garantimin e lëvizjes së lirë të qytetarëve në pikat e kalimit kufitar. Rikthimi i radhëve kilometrike në Kakavijë është i papranueshëm”.

Ish-presidenti kërkoi nga autoritetet përgjegjëse shtetërore të “ndërpresim menjëherë pushimet, të ngrihen në këmbë dhe të marrin çdo masë të duhur dhe të mundshme”.

“I inkurajoj gjithashtu autoritetet greke, që në respekt të frymës së fqinjësisë së mirë dhe marrëdhënieve të ngushta tradicionale, të bëjnë gjithçka për të shmangur situata të papranueshme dhe kriza humanitare në pikat e kalimit kufitar, imazhet e të cilave i turpërojnë të dyja vendet tona”.

Radha e gjatë kilometrike e krijuar në Kakavijë nga pushuesit që janë drejtuar për në Shqipëri, është krijuar për shkak se pala greke po punon vetëm me dy sportele në hyrje dhe dy në dalje.

Sipas burimeve, në pjesën greke ka pasur radhë automjetesh që në orët e para të mëngjesit, ndërsa tani është shtuar më shumë.

Nga ana tjetër, pala shqiptare po punon me katër sportele në hyrje dhe tre në dalje.

Radhë e gjatë në Kakavijë, shkak mungesa e sporteleve greke

/Albanianpost.com


Lajmet kryesore