Qytetarët me ID të skaduar s’lejohen të votojnë, Celibashi: S’jemi organi kompetent për shtyrjen e afateve

Komisioneri Shtetëror i Zgjedhjeve, Ilirjan Celibashi reagoi sot pasi disa qytetarë me karta identiteti të skaduara nuk janë lejuar që të votojnë në qendrën e votimit në Himarë fshat.

Celibashi solli në vëmendje se KQZ nuk është organi kompetent për shtyrjen e afateve të vlefshmërisë të dokumenteve të identifikimit.

“Për zgjedhësit mbi 75 vjeç vlefshmëria e dokumenteve të identifikimit është pa afat. Kështu përcaktohet në ligjit nr. 89/2020, datë 09/07/2020 “Për një shtesë në ligjin nr. 8952, datë 10.10.2002 “Për letërnjoftimin elektronik të shtetasve shqiptarë”, i ndryshuar””, thekson Celibashi në një reagim në rrjetet sociale.

Kryetari i qendrës së votimit është shprehur në një prononcim për mediat se “në Himarë fshat ka shumë persona që janë me karta të skaduara dhe insistojnë që të votojnë, ndërkohë që ligji nuk e lejon. Nga kjo çështje është krijuar një konfuz ku kemi njoftuar KQZ që të vijë dhe të zgjidhë këtë ngërçin”.

“Ligji e thotë qartë që me kartat e skaduara nuk mund të votojë asnjë person. Edhe pasaporta të mos ketë skaduar si afat. Komisionerët në bazë të ligjit kanë të drejtë për ta pezulluar për të zgjidhur çështjen”.

Lidhur me këtë situatë ka reaguar edhe Omonia në Himarë, e cila shprehet se kartat u dhanë në mënyrë selektive.

“Që me nisjen e procesit zgjedhor në Bashkinë Himarë, me insistimin e komisionerëve të Partisë Socialiste, dhjetëra zgjedhësve u refuzohet e drejta e votimit me pretendimin e dokumenteve të identifikimit të skaduara. Në kundërshtim me praktikat e aplikuara në proceset e mëparshme zgjedhore, Kryeministri Rama refuzoi të nxjerrë aktet përkatëse ligjore që do të garantonin të drejtën e votës për të gjithë zgjedhësit. Kompania shtetërore e prodhimit të kartave të identitetit, ishte vënë gjatë ditëve të fundit në shërbim të Partisë Socialiste, duke u shërbyer qytetarëve në mënyrë selektive”.

Sipas saj, “anëtarëve të PS u rinovoheshin dokumentet në mënyrë të organizuar brenda 24 orëve, ndërsa qytetarëve të tjerë u kërkohej të paraqiteshin pas 15 ditësh”.

“Në total, nga 23074 zgjedhës të regjistruar, 6157 janë apriori të privuar nga e drejta e zgjedhjes me vendim dhe përgjegjësi të Qeverisë Rama”,  thuhet në reagimin e Omonoia Dega Himarë.

KQZ ka raportuar gjithashtu pjesëmarrjen e votuesve në zgjedhjet për Kryebashkiak të Himarës deri në orën 10:00. Të dhënat bazohen në 31 nga 36 qendrat e votimit.

Referuar shifrave zyrtare në proces kanë marrë pjesë 2487 zgjedhës, nga 20676 të regjistruar. Sipas KQZ pjesëmarrja llogaritet në 12.03 %.

Në garë për postin janë Vangjel Tavo nga ana e mazhorancës (nën siglën e Partisë Socialiste) dhe Petro Gjikuria nga ana e opozitës (nën siglën e Bashkë Fitojmë).

23 mijë e 74 qytetarë kanë të drejtën e votës, të cilat do të hidhen në 36 qendrat e votimit të hapura prej orës 07:00 dhe që do të mbyllen në orën 19:00.

Ashtu siç KQZ ka bërë me dije, do të aplikohet vetëm identifikimi elektronik dhe qendrat e votimit do të jenë të monitoruara me kamera.

Voton Vangjel Tavo, fton himariotët të zgjedhin alternativën më të mirë

Një bashki në konflikt

Në zgjedhjet e fundit lokale të mbajtura në 2023-shin, kandidati fitues Alfred Beleri u arrestua 48 orë para votimit, duke u bërë kandidati i vetëm në historinë e zgjedhjeve shqiptare që zgjidhet kryetar në burg.

Më 12 maj Beleri përfundoi në pranga pasi u akuzua për korrupsion zgjedhor, duke u faktuar se ai kishte kryer aktin e blerjes së votës.

Teksa Beleri ndodhej në burg, kryetar i bashkisë mbeti ai aktual (humbësi i zgjedhjeve) Jorgo Goro.

Por burgu nuk i ndahet bashkisë së Himarës.

Ishte radha e Jorgo Goros për t’u arrestuar. Ai u prangos më 23 mars të këtij viti – i akuzuar nga vetë Beleri për tjetërsim votash.

Fill pas kësaj, mazhoranca socialiste emëroi dy kryetarë të tjerë të komanduar.

E para ishte Blerina Bala, e cila dha dorëheqjen më 5 qershor, për arsye – sipas saj – personale.

Më pas kryetar i komanduar u vendos Arqile Bollano, i cili aktualisht ndodhet në një proces hetimi për korrupsion nga SPAK.

Ishte dënimi i Fredi Belerit me dy vite burg nga Apeli i GJKKO-së ai i cili i hapi rrugë zgjidhjes së ngërçit në Bashkinë e Himarës.

Kjo pasi u bë e mundur heqja e mandatit si kryebashkiak nga ana e KQZ-së. Beleri aktualisht është deputet në Parlamentin Evropian në emër të partisë “Demokracisë së Re” në Greqi.

Jo vetëm zgjedhje

Instituti i Studimeve Politike (ISP) ka realizuar një raport për zgjedhjet vendore në Himarë, ku thekson se kjo bashki është kthyer në një “patate të nxehtë” për shkak të çështjes Beleri, por pretendon se oligarkët dhe zyrtarët kryesorë kanë interesa për investime në turizëm.

“Kjo bashki nuk zë një pozicion të rëndësishëm në hierarkinë dhe strukturën e pushtetit vendor në Shqipëri, por për shkak të pretendimeve dhe debatit politik mes Shqipërisë dhe Greqisë, si dhe interesit strategjik të disa prej oligarkëve dhe zyrtarëve kryesorë në vend për investimet turistike, bashkia ka marrë një vlerë të veçantë dhe zhvillimet atje kanë një interes të dyfishtë”.

Referuar të dhënave të përpunuara nga ISP, që nga viti 2000, zgjedhjet atje kanë qenë kryesisht produkt i marrëdhënieve politike mes PS-së dhe PD-së.

Në vitin 2000 dy partitë u bashkuan kundër kandidatit Bollano, një figurë ekstremiste vendase duke e mposhtur atë me fitore dërrmuese.

Por në vitin 2003 dhe 2007 i njëjti kandidat, Bollano, tashmë me mbështetjen e PS-së dhe më pas të PD-së, siguroi tre mandate radhazi, i fundit (2019) pa kandidatë rivalë.

Të katër drejtuesit e viteve 2000-2024 (Mato, Bollano, Goro dhe Beleri) janë arrestuar, hetuar apo dënuar për vepra të ndryshme penale (korrupsion apo vepra të tjera penale), një numër rekord për drejtimin e një bashkie në Shqipëri.

Aktualisht, zgjedhjet janë mes dy blloqeve kryesore politike, me kandidatë të “sjellur”, Tavo nga Gjirokastra dhe Gjikuria nga SHBA.

Zgjedhjet e 4 gushtit, të vetmet prej disa dekadash në Shqipëri në pikun e sezonit turistik, kanë vlerë simbolike.

Kryesisht për të vënë në provë aftësinë e Shqipërisë për zgjedhje, interesin vendor për pjesëmarrje dhe pjekurinë e partive për rikthimin në normalitet të një prej bashkive më të rëndësishme për nga potenciali turistik.

Pavarësisht rezultatit, zgjedhjet nuk pritet t’i japin fund debatit dhe keqpërdorimeve, të cilat janë në interes të partive – të vazhdojnë të paktën deri pas zgjedhjeve parlamentare të vitit 2025.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.