QIKA kritikon ministrat Haxhiu dhe Sveçla: Pjesëmarrja e tyre në protestë e pakuptimtë

Qendra për Informim, Kritikë dhe Aksion ka kritikuar ministren e Drejtësisë, Albulena Haxhiu dhe ministrin e Punëve të Brendshme Xhelal Sveçla, për prezencën e tyre në protestën e aktivistëve të mbrojtjes së të drejtave të grave, pas vrasjes së 18-vjeçares në Ferizaj.

Në një reagimin e tyre QIKA ka theksuar se pjesëmarrja e tyre në këtë protestë është e pakuptimtë dhe e pavend, “ashtu siç janë edhe deklaratat e tyre shfajësuese (përligjëse) për rastin e vrasjes së Marigona Osmanit”.

“Para se të jetë fizikisht në protestë, ministrja duhet të jetë para strategjisë së munguar tash e tetë muaj. Strategjia kombëtare për mbrojtje nga dhuna në familje 2016-2020, ka skaduar në dhjetor të vitit 2020, e cila edhe ashtu është zbatuar vetëm pjesërisht. Ministria e Drejtësisë është përgjegjëse për draftimin dhe zbatimin e kësaj strategjie”, ka thënë QIKA për ministren e Drejtësisë, Albulena Haxhiu.

“Kërkesat e parashtruara sot në protestë nuk kanë nevojë për mbështetje por realizim. Kjo është detyra juaj. Me konsensus nuk arrihet drejtësia, as barazia. Betejat vazhdojnë”.

Aktivistët e kësaj organizate protestuan para Ministrisë së Drejtësisë dhe asaj të Punëve të Brendshme, duke kërkuar trajtim urgjent të rasteve të vrasjes së grave dhe parandalim të tyre, protestuesit u përcollën nga dy ministrat.

Pasditen e së dielës, më 22 gusht 2021, para Qendrës së Emergjencës në Ferizaj, u la pa shenja jete 18-vjeçarja, Marigona Osmani, nga Dardan Krivaqa dhe Arbër Sejdiu.

Të dy u arrestuan më vonë, njëri pas disa orëve e tjetri pas dy ditëve, në të njëjtën kohë kur qytetarë të shumtë po protestonin duke kërkuar dënimin maksimal për fajtorin.

Marigonës iu dha lamtumira e fundit të mërkurën më 24 gusht, në varrezat e Ferizajt.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.