Qeveria vendos që të nis rindërtimin e shtëpive në Veri që janë dëmtuar në 1998-99

Qeveria e Kosovës, në mbledhjen e të mërkurës ka marrë vendim që të nis rindërtimin dhe renovimin e shtëpive në Veri, që janë dëmtuar në periudhën e luftës 1998-1999.

Kryeministri i Kosovës, Albin Kurti, në prezantimin e këtij projektligji ka thënë se ky vendim ka ardhur në bashkëpunim me Ministrinë e Mjedisit dhe Planifikimit Hapësinorë, për shkak të dëmeve të mëdhaja që kanë ardhur nga Serbia.

“Për rindërtimin dhe renovimin e shtëpive individuale të familjeve të cilëve u janë dëmtuar shtëpitë gjatë periudhës kohore 1998-1999, gjatë luftës së fundit vendit tonë i janë shkaktuar dëme masive, shkatërruese nga Serbia që vazhdojmë t’i vuajmë akoma”, ka thënë Kurti.

“Bazuar në vlerësimin nga komisioni përkatëse të dëmeve të shkatërruara në Veri të Mitrovicës, Qeveria e autorizon Ministrinë e Mjedisit, Planifikimit Hapësinorë që në bashkëpunim me familjarët të nis renovimin për shtëpitë e dëmtuar gjatë 1998-1999”.

Zëvendësministri i Mjedisit, Hysen Durmishi, para ministrave tha se familjet që kanë pasur dëmtime materiale të shtëpive gjatë periudhës së luftës, po vazhdojnë të qëndrojnë me qira në lokacione të ndryshme të Kosovës.

“Bazuar në situatën faktike në Veriun e Republikës së Kosovës, mbi dëmet e shkaktuara gjatë viteve 1998-1999 e që këto familje momentalisht jetojnë me qira në pjesën e jugut dhe në komunat e tjera të Kosovës, e që deri tani nuk kanë pasur përkrahje për rindërtimin e shtëpive të tyre gjatë kësaj periudhe”.

Ai ka shtuar se, “ky proces ka plotësuar të gjitha fazat nga rregullorja e Qeverisë së Kosovës”.

Po ashtu në mbledhje është miratuar edhe vendimi që të ndahen 6 milionë euro shtesë për projektin e ndërtimit të rrugës Prishtinë-Podujevë.

Kryeministri Albin Kurti ka thënë se Ministria e Mjedisit, Planifikimit Hapësinor dhe Infrastrukturës, po vazhdon punimet me intensitet të lartë në këtë rrugë.

“Ministria përgjegjëse për Infrastrukturë është angazhuar që punimet të vazhdojnë me intensitet të lartë, andaj duke e konsideruar dinamikën aktuale të punimeve sjellim para jush për aprovim ndarjen e mjeteve shtesë për këtë rrugë”, tha Kurti.

Në mbledhjen e Qeverisë së Kosovës, është shkarkuar edhe bordi i  “Trepçës”.

Ministrja e Ekonomisë, Artane Rizvanolli deklaroi se kjo po bëhet pasi që në shtator të 2023, dy anëtar mbikëqyrës kanë dhënë dorëheqje dhe kanë mbetur vetëm tre anëtarë që do të thotë se “është jofunksional”.

Propozimet për emërimin e bordit të përkohshëm janë: Rrezarta Pllana kryesuese, Alban Krasniqi anëtar, Merita Beqiri Gashi anëtar, Dragisha Kristoviç anëtar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.