Lajme

Qeveria rrit në 90 milionë euro subvencionimin e rrymës


Ilustrim

Qeveria e Republikës së Kosovës ka marrë vendim në mbrëmjen e së shtunës së pesë shkurtit me të cilin ka ngritur vlerën e zotuar për subvencionim të energjisë elektrike në vlerë prej 90 milion euro, nga 75 milionë sa ishte në një vendim të mëhershëm.

Vendimi ka dalë nga mbledhja e 60-të e Qeverisë e cila është mbajtur online, thuhet në njoftimin e Zyrës së Kryeministrit.

“Në mbledhjen e sotme është miratuar propozimi i Ministrisë së Ekonomisë për zotimin e Qeverisë për subvencionimin e pagesës së energjisë nga konsumatorët. Sipas vendimit të miratuar, Qeveria e Republikës së Kosovës është zotuar për subvencionim të energjisë në shumën prej 90.000.000.00 € (nëntëdhjetë milionë euro)”, thuhet në njoftim.

Qeveria me këtë vendim synon të ulë ndikimin e tarifave të energjisë për konsumatorët të cilat pritet të rriten së shpejti nga Zyra e Rregullatorit të Energjisë (ZRRE).

“Ky vendim është marrë pas rritjes enorme të çmimeve të importit, që ka shkaktuar krizën e furnizimit me energji elektrike në vend”, thuhet më tej në njoftim.

Ministri i Financave, Hekuran Murati, në një konferencë për media me një shkurt ka prezantuar disa nga komentet që dikasteri të cilën ai e drejton ka dërguar në drejtim të Zyrës së Rregullatorit të Energjisë, ku njëra prej tyre është që ngritja e çmimit të energjisë elektrike të mos aplikohet për ata që shpenzojnë deri në 1 mijë kilovatë orë.

Kjo 1 mijë kilovatë orë sipas Muratit do të jetë i ndarë në 500 kilovatë orë gjatë ditës dhe 500 kilovatë orë gjatë natës.

“Për ata familje që nuk e tejkalojnë këtë prag nuk do të ketë farë ekspozim ndaj rritjeve në çmim”, ka thënë Murati

Ndërsa për ata që e tejkalojnë këtë prag propozimi Ministrisë së Financave është që edhe kur tarifa e lartë kalohet mbi 500 kilovatë orë çmimi i saj të ulet nga 14 centë në 11 centë e gjysmë, pra që edhe këtu të ketë një zbritje.

Ministri i Financave, Hekuran Murati

“Meqenëse konsiderojmë se për një afat kaq të shkurtër është e vështirë për familjet të përshtaten menjëherë dhe për 1 mijë kilovatë orët çmimi të mbetet i pa ndryshuar”, ka shtuar ai.

Ai madje ka propozuar për një ulje të konsumit të energjisë elektrike në amvisëri prej pesë për qind e cila sipas tij do të rezultonte me më pak import të rrymës.

“Kemi identifikuar afërsisht 22 milionë euro kursime për sa i përket hyrave maksimale të lejuara dhe kjo ka të bëjë me supozimin se për shkak të ndryshimit tarifor për shkak të masava nxitëse që do ti kemi si qeveri për kursim të energjisë elektrike mund të supozohet se një pjesë e konsumit mund të zvogëlohet dhe një ulje prej 5 për qind rezulton me më pak import prej rreth 18 milionë euro”, ka shtuar ai.

ZRRE ende nuk ka filluar me shqyrtimin e komenteve për tarifat e reja në kuadër të shtrenjtimit të energjisë elektrike të cilat i janë dërguar nga institucionet, organizatat dhe qytetarët.

/Albanianpost.com


Lajmet kryesore