Qeveria ndan edhe 1 milionë euro shtesë për ndërtimin e shtëpive në katër komunat veriore

Edhe 1 milionë euro shtesë për ndërtimin e shtëpive në katër komunat veriore janë ndarë nga Qeveria e Kosovës, në mbledhjen e të mërkurës.

Kryeministri i Kosovë, Albin Kurti, ka sqaruar se ky subvencionim po bëhet për nevojën shtesë që kanë komunat veriore.

“Kemi edhe kërkesën e ministrisë së Administrimit të Pushtetit Lokal, kjo ndarje buxhetore. Kjo ndarje e mjeteve buxhetore bëhet për subvencionimin e ndërtimeve të shtëpive në katër komunat veriore në shumë prej 1 milionë eurove”.

Ministri i Financave, Punës dhe Transfereve Hekuran Murati para ministrave ka thënë se kërkesa ka ardhur nga ministria e Administrimit të Pushtetit Lokal për ndarje shtesë të buxhetit.

“Është e nevojshme që të shtohen mjete shtesë dhe të ketë mbështetje shtesë ky program. Prandaj edhe kemi propozuar edhe ndarjen buxhetore shtesë prej 1 milionë euro”.

Qeveria vendos që të nis rindërtimin e shtëpive në Veri që janë dëmtuar në 1998-99

Shtyhet sërish regjistrimi i popullsisë

Në këtë mbledhje është shtyrë sërish regjistrimi i popullsisë i cili ishte paraparë të bëhej fillimisht në shtator, e më pas i shtyrë sërish për nëntor.

Qeveria të mërkurën ka vendosur ta shtyjë këtë proces për prill të 2024-ës.

Regjistrimi i popullsisë, sipas vendimit të ri, të miratuar nga ekzekutivi do të bëhet nga 5 prilli deri më 17 maj 2024.

Miratohet projektligji që ua mundëson pajisjen qytetarëve me letërnjoftim që nga lindja

Qeveria e Kosovës, përmes projektligjit të ri për letërnjoftime u ka mundësuar qytetarëve që nga lindja që të pajisen me letërnjoftim.

Ky projektligj është miratuar në mbledhjen e të mërkurës nga ministrat.

Ministri i Punëve të Brendshme, Xhelal Sveçla, ka deklaruar se përmes kësaj qytetarëve do t’u mundësohet lëvizja jashtë Kosovës vetëm me letërnjoftim me vendet që ka Kosova marrëveshje.

“Si risi e këtij projektligji është krijimi i mundësisë që shtetasi i Kosovës nga lindja deri në moshën 16-vjeçare të mund të pajiset me letërnjoftim, por pa qenë i detyruar. Kjo do t’iu mundësojë qytetarëve të kësaj moshe që të lëvizin jashtë Republikës së Kosovës vetëm me letërnjoftim, në ato vende me të cilat ka marrëveshje Republika e Kosovës”, ka thënë Sveçla.

Ai ka sqaruar se ky projektligj rregullon edhe shfrytëzimin e të dhënave elektronike nga letërnjoftimi, formën dhe përmbajtjen, afatin e vlefshmërisë së tij si dhe rregullat në rast të dëmtimit, humbjes apo vjedhjes së letërnjoftimit.

“Ky projektligj është hartuar në pajtim me programin legjislativ të Qeverisë së Republikës së Kosovës për vitin 2023, Kushtetutën si dhe direktivat e Bashkimit Evropian”.

Qeveria ka miratuar edhe rregulloren për funksionimin dhe punën në Qendrën për Strehimin, Mbrojtjen dhe Rehabilitimin e Viktimave të Trafikimit me Qenieve Njerëzore në nivel të mesëm dhe të lartë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.