![](https://albanianpost.com/wp-content/uploads/2023/04/hjgmjhgmjh.png)
Qeveria indiane është akuzuar për rishkrimin e historisë për t’iu përshtatur agjendës së saj nacionaliste hindu, pasi tekstet shkollore u redaktuan për të hequr referencat ndaj kundërshtimit të Mahatma Gandit ndaj nacionalizmit hindu.
Po ashtu dhe përmendjen e një trazire të diskutueshme fetare në të cilën kryeministri, Narendra Modi, ishte i implikuar.
Tekstet shkollore u rishikuan gjithashtu për të hequr kapitujt mbi historinë e Mughal-ëve, sundimtarëve myslimanë që kontrolluan pjesën më të madhe të Indisë midis shekujve XVI dhe XIX.
Partia në pushtet Bharatiya Janata (BJP), e cila ka ndjekur një agjendë nacionaliste hindu që e ka larguar Indinë nga themelet e saj laike, ka qenë e hapur për dëshirën e saj për të rishkruar historinë e vendit dhe për t’u shkëputur nga ajo që e përshkruan si “mentalitet skllav” të shtypësve kolonialë.
“Është përgjegjësia jonë të shkruajmë historinë tonë”, tha ministri i Punëve të Brendshme, Amit Shah, në një fjalim të vitit 2019.
Botimet e reja të teksteve shkollore të shkencave politike dhe të historisë të botuara nga Këshilli Kombëtar i Kërkimit dhe Trajnimit Arsimor (NCERT) shkaktuan polemika mbi ndryshimet, disa prej të cilave u prezantuan në heshtje dhe pa njoftimet e zakonshme publike.
Ndër ndryshimet në librin shkollor të shkencave politike për 17 dhe 18-vjeçarët ishte heqja e një referimi ndaj mospëlqimit të nacionalistëve hindu ndaj Gandit, luftëtarit të famshëm të lirisë së Indisë, dhe se si ata bënë përpjekje të shumta për ta vrarë atë.
Gandhi u vra nga një nacionalist hindu, Nathuram Godse, në vitin 1948. Gandhi ende shahet nga disa nacionalistë hindu për pikëpamjet e tij mbi unitetin hindu-mysliman dhe që kur BJP erdhi në pushtet, ka pasur një nderim në rritje mes të vijës së ashpër për vrasësin e tij.
Sipas shqyrtimit të librave shkollorë nga gazeta Indian Express, e cila zbuloi ndryshimet, referenca të shumta për trazirat e Gujarat janë hequr gjithashtu nga tekstet shkollore.
Trazirat, të cilat ndodhën në vitin 2002, janë një temë veçanërisht e ndjeshme për Modin, i cili ishte kryeministër i Gujarat në atë kohë dhe u akuzua si bashkëpunëtor në dhunën, e cila përfshinte sulme brutale ndaj familjeve myslimane dhe vdekjen e më shumë se një mijë personave, kryesisht myslimanë.
Një dokumentar i BBC-së që eksploronte rolin e Modit në trazirat u ndalua së fundmi nga qeveria.
Pas rishikimeve të fundit, referencat për trazirat janë zhdukur nga të gjithë tekstet shkollore të shkencave sociale për ata të moshës 11 dhe 18 vjeç.
Po ashtu janë hequr kapitujt që kanë të bëjnë me gjykatat Mughal nga librat e historisë për 17 dhe 18-vjeçarët, sipas masave për të “racionalizuar” kurrikulën dhe për të zvogëluar ngarkesën e punës së studentëve pas pandemisë.
Historianët dhe politikanët e opozitës dënuan gjerësisht rishikimet e teksteve shkollore. “Ju mund të ndryshoni të vërtetën në libra, por nuk mund të ndryshoni historinë e vendit”, ka thënë Mallikarjun Kharge, presidenti i partisë opozitare të Kongresit.
Aditya Mukherjee, një profesoreshë e historisë bashkëkohore indiane në Universitetin Jawaharlal Nehru, ka thënë se heqja e historisë Mughal nga libri shkollor ishte një përpjekje për të fshirë historinë për t’iu përshtatur agjendës politike të qeverisë.
“Sa herë që kemi qenë dëshmitarë të fshirjes së një komuniteti të caktuar nga historia jonë, ai zakonisht pasohet nga një gjenocid i komunitetit”, ka thënë Mukherjee.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com