Qeveria fiton rastin ndaj komunave për faljen e tatimit në pronë, Murati: Kritikat kanë qenë të pabaza

Gjykata Kushtetuese ka vendosur në favor të Qeverisë së Kosovës, sa i përket ankesës së bërë nga komunat për faljen e tatimit në pronë. Sipas vendimit të gjykatës, i bërë publik këtë të mërkure, komunat duhet të vendosin vetë për faljen e tatimit në pronë.

“Gjykata ka vendosur që (i) kërkesa është e pranueshme; (ii) neni 5 i Ligjit të kontestuar nuk është në kundërshtim me paragrafin 2 të nenit 12 [Pushteti Lokal], paragrafin 1 të nenit 123 [Parimet e Përgjithshme] dhe paragrafët 2 dhe 5 të nenit 124 [Organizimi dhe Funksionimi i Vetëqeverisjes Lokale] të Kushtetutës; (iii) të shfuqizojë Vendimin për Masë të Përkohshme të 1 shtatorit 2023, meqenëse Gjykata tashmë ka vendosur lidhur me meritat e rastit; si dhe që (iv) afati i mbetur pesëmbëdhjetë (15) ditor nga afati tridhjetë (30) ditor i përcaktuar në paragrafin 2 të nenit 11/B (Shuma e faljes së tatimit në pronë për pronën e paluajtshme) të nenit 5 të Ligjit të kontestuar, fillon të rrjedhë nga dita e hyrjes në fuqi të Aktgjykimit”, thuhet në vendimin e Kushtetueses.

Më 4 shtator, Gjykata Kushtetuese e Kosovës, kishte vendosur masë të përkohshme për nenin 5 të Ligjit për tatimin në pronë, i cili parasheh faljen e 100 eurove të tatimit për qytetarët.

Kërkesa për vlerësimin e kushtetutshmërisë së Ligjit për Tatimin në Pronë ishte bërë nga Asociacioni i Komunave të Kosovës, përkatësisht nga kryetari i AKK-së, Sazan Ibrahimi dhe Kryetari i Komunës së Prizrenit, Shaqir Totaj, më 25 gusht.

Mirëpo, në vendimin e së mërkurës Kushtetuesja ka bërë të ditur se periudha 15-ditëshe që komunat të vendosin për faljen e tatimit në pronë, nis nga dita e hyrjes në fuqi të aktgjykimit.

“Aktgjykimi në fund sqaron që (i) marrë parasysh faktin që Ligji i kontestuar ka hyrë në fuqi më 16 gusht 2023, ndërsa rrjedhja e afatit tridhjetë (30) ditor i përcaktuar në paragrafin 2 të nenit 11/B (Shuma e faljes së tatimit në pronë për pronën e paluajtshme) të Ligjit të kontestuar është ndërprerë me 1 shtator 2023 me vendosjen e masës së përkohshme nga Gjykata, e cila e ka pezulluar zbatimin e nenit 5 të Ligjit të kontestuar deri në vendimmarrjen meritore të saj; (ii) pjesa e mbetur e afatit pesëmbëdhjetë (15) ditor të saktësuar në nenin e lartcekur, fillon të rrjedhë nga dita e hyrjes në fuqi të këtij Aktgjykimi, përkatësisht me publikimin e tij në Gazetën Zyrtare të Republikës së Kosovës, me ç’rast shfuqizohet edhe Vendimi për Masë të Përkohshme”, thuhet aty.

Lidhur me vendimin e Kushtetueses ka reaguar edhe Ministri i Financave, Punës dhe Transfereve, Hekuran Murati.

Përmes një postimi në Facebook, Murati ka theksuar se “të gjitha kritikat e akuzat ndaj Qeverisë për këtë temë kanë qenë të pabaza, dhe kjo gjë edhe u dëshmua tani”.

“Qytetarët tashmë e kanë kuptuar se opozita synim të vetëm e ka bllokimin e shtetit, qoftë edhe në kurriz të qytetarëve. Qytetarët do ta mbajnë mend këtë”, shkroi ai.

Me ligjin e ri, qeveria e drejtuar nga Albin Kurti, ua kishte mundësuar komunave që të vendosin vetë për faljen e tatimit për 100 euro, pasi që Ministria e Financave ka rritur tatimin në pronë pothuajse dyfish.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.