Qeveria britanike ndryshon mendje, braktis planin për uljen e normës së taksave për të pasurit

Qeveria e kryeministres, Liz Truss, ka braktisur planin e saj për të hequr normën më të lartë prej 45% të tatimit mbi të ardhurat.

Kjo ka shënuar një kthesë të menjëhershëm pas një revolte në rritje mbi politikën dhe një reagimi të trazuar nga tregjet e bursës.

Duke njoftuar vendimin në një postim në median sociale në Twitter ministri britanik i Financave, Kwasi Kwarteng tha se është dëgjuar kërkesa e njerëzve.

“Vendimi për të ulur taksat për njerëzit me të ardhura prej 150 mijë paundësh ose më shumë është kthyer në një shpërqendrim nga misioni ynë kryesor për të trajtuar sfidat me të cilat përballet vendi ynë”.

“Si rezultat, unë po njoftoj se nuk po vazhdojmë me heqjen e taksës 45p”.

Por, në një raund të intervistave të transmetuara disa orë përpara se të fliste në konferencën konservatore në Birmingham, Kwarteng mohoi se mini-buxheti i tij 10 ditë më parë kishte qenë një gabim, pavarësisht ndikimit të tij në paund dhe në koston e borxhit të qeverisë.

Kwarteng këmbënguli se pjesa më e madhe e trazirave të tregut ishte shkaktuar nga faktorë ndërkombëtarë dhe refuzoi ftesat e përsëritura për të kërkuar falje.

Planet për të hequr shkallën më të lartë të taksave kishin parë kundërshtime të jashtëzakonshme nga tregjet, partitë opozitare dhe një numër në rritje i deputetëve konservatorë.

Kryetari i Partisë Konservatore, Jake Berry, kishte paralajmëruar më parë deputetët konservatorë që votuan kundër masave tatimore të kryeministrit se ata do të përjashtoheshin nga partia parlamentare – e njohur si humbja e kamxhikut.

Por gjithnjë e më shumë, dukej se Truss nuk i kishte numrat për ta kaluar atë në Parlament.