Qeveria akoma s’ka dorëzuar propozimet për dinarin, “s’jemi vagoni i parë, por i dyti”

Kryeministri i Kosovës, Albin Kurti, në lidhje me propozimet që do të dorëzohen nga Qeveria e Kosovës, për dinarin të premten e 22 marsit, ka deklaruar se akoma s’janë dorëzuar nga ana e tyre.

Kurti, në konferencë për media, ka ritheksuar se ndonëse vendimi i BQK-së është “i panegociueshëm”, propozimet do t’i dorëzojnë gjatë ditës.

“Akoma s’ka përfunduar dita e sotme për dërgimin e propozimeve tona. Duhet ta keni parasysh rregullorja e BQK-së, është e panegociueshme është vendim plotësisht i pavarur i këtij institucioni të pavarur të shtetit tonë”.

Sipas tij, ekzekutivi aktualisht është reaguesi i dytë në lidhje me këtë çështje.

“BQK-ja është edhe lartë edhe përpara edhe sipër nesh edhe na prinë. Përveç që kanë marrë rregullore të re nga 27 dhjetori, ata kanë ofruar edhe një plan 10 pikësh për tranzicion. Nëse ka pasoja në terren, ne do t’u përgjigjemi gjithashtu. Ne nuk jemi as lokomotiva e as vagoni i parë, ne jemi vagoni i dytë”.

Deri të premten (22 mars) Kosova dhe Serbia do të dërgojnë propozimet e tyre lidhur me dinarin, pas vendimit të Bankës Qendrore të Kosovës për ndalimin e kësaj valute për pagesa në territorin kosovar, ndërsa të hënën do të mbahet takimi i radhës në nivel kryenegociatorësh.

Këto janë deklaratat kryesore që dolën pas cikleve të takimeve që u mbajtën të martën në Bruksel, në mes të kryenegociatorit të Kosovës, Besnik Bislimi, atij serb Petar Petkoviç, dhe Emisarit Special të Bashkimit Evropian për dialogun Prishtinë-Beograd, Miroslav Lajçak.

Fillimisht, pas takimit trepalësh [Bilimi-Petkoviç-Lajçak], kryenegociatori i palës shqiptare të Kosovës njoftoi për afatin që palët kanë për të dërguar propozimet e tyre në kryeqendrën evropiane, aty ku fasilitohet dialogu, për dinarin.

“U dakorduam që deri të premten secila palë të sjellë propozimin e saj se si e sheh zgjidhjen afatshkurtër dhe se si të fillohet zgjidhja afatgjate e dinarit. Dhe pastaj javën e ardhshme do të mblidhemi sërish të diskutojmë se a mund të gjejmë hapësire që këto dy propozime të bëhen një propozim”, deklaroi Bislimi.

Ky ishte takimi i dytë që u organizua nga BE-ja për çështjen e dinarit.

Një raund i negociatave ndërmjet ekspertëve financiarë të Kosovës dhe Serbisë u zhvillua më 27 shkurt 2024 në kryeqendrën evropiane, por përfundoi pa rezultate konkrete.

Kosova refuzoi që të përfaqësohet në nivel politik sepse konsideroi që dinari nuk duhet të jetë temë për dialog.

Lajçak, të martën, fillimisht priti në takim kryenegociatorin dhe zëvendëskryeministrin kosovar, pastaj zhvilloi një takim me delegacionin serb të udhëhequr nga Petkoviç.

E ky cikël i ri i negociatave në nivel të kryenegociatorëve vjen në mes të paralajmërimeve të zyrtarëve evropianë për rritje të presionit ndaj të dyja palëve për të zbatuar marrëveshjen e arritur një vit më parë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.