Qendra e emigrantëve në Shqipëri – “Gati nga mesi i gushtit”

“Nga mesi i gushtit”.

Një burim shqiptar ka konfirmuar për gazetën italiane “il Giornale” se hot spoti nën juridiksionin italian për 30 mijë emigrantë të paligjshëm në vit nuk do të funksionojë më përpara.

Afati i 1 gushtit i vendosur nga kryeministrat Edi Rama dhe Giorgia Meloni tashmë është shtyrë, siç ishte parashikuar edhe nga nënsekretari Alfredo Mantovano.

“Do të ketë një vonesë dhjetë ditore”, parashikoi ministri i Mbrojtjes, Guido Crosetto për “Foglio”.

Dy qendrat e drejtuara nga italianët po ndërtohen në Shëngjin dhe Gjadër.

E para në portin e Shëngjinit përmban katër ndërtesa të mëdha dykatëshe që mbulojnë një sipërfaqe prej 6 mijë metrash katrorë.

Menaxheri i policisë së shtetit italian, Evandro Clementucci, mbikëqyr qendrën dhe tregoi rreth dhomës së kontrollit e cila monitoron me 40 kamera CCTV gardhin metalik me perimetër pesë metra të lartë.

Clementucci shpjegoi se vetëm burrat beqarë të shpëtuar në ujërat ndërkombëtare do të dërgoheshin këtu.

Plani zbatohet për njerëzit nga vendet e konsideruara “të sigurta” nga qeveria italiane si Tunizia, Egjipti, Algjeria, Nigeria, Maroku dhe Bangladeshi.

Do të thotë, në rast të një kërkese azili të refuzuar, ata mund të riatdhesohen për shkak të marrëveshjeve të Italisë me ato vende.

Shëngjini është qendra fillestare e pritjes për emigrantët.

Ajo do të përbëhet nga rreth 70 persona, duke përfshirë oficerë policie italiane dhe kontraktorë privatë që menaxhojnë të dyja qendrat.

Emigrantët që mbërrijnë këtu marrin një kontroll shëndetësor, u jepet ushqim, ujë dhe rroba dhe kanë akses në këshilla të pavarura ligjore.

“Dua të jem i qartë: Unë nuk i shoh ata si kriminelë. Ne do t’i trajtojmë ata si mysafirët tanë, ne duam që ata të jenë të sigurt”, tha Clementucci.

Më pas pjesa tjetër është e vendosur në Gjadër – një ish-bazë ushtarake.

Ambasadori i Italisë në Shqipëri, Fabrizio Bucci, hodhi poshtë çdo krahasim me skemën e dështuar të azilit të Mbretërisë së Bashkuar në Ruandë.

“Të dy planet nuk janë të krahasueshëm dhe lidhja e pretenduar mes tyre është e papërshtatshme”.

“Brenda qendrave tona në Shqipëri ka juridiksion italian: pra ligjet italiane dhe rregullat italiane. Ne kemi studiuar gjithashtu legjislacionin shqiptar për migracionin dhe e dimë se përputhet me legjislacionin evropian”, tha Bucci.

Ndërtimi në qendrën e Gjadrit duket se është prapa planit – materialet e ndërtimit, dritaret dhe dyert mbushin vendin – por zyrtarët janë të bindur se do të jetë gati “brenda disa javësh”.

Hapja tashmë është shtyrë tre herë. Ndër arsyet e vonesave ishin kushtet e të nxehtit.

Shembull 

15 nga 27 vendet e Bashkimit Evropian i kanë kërkuar Italisë të ndajë detajet e skemës së tyre.

Zyrtarët italianë kanë refuzuar të thonë se sa do të kushtojë projekti, por marrëveshja pesëvjeçare do të kushtojë pothuajse 1 miliard euro.

Një zëdhënës i Komisionit Evropian konfirmoi për “Sky News” se po monitoron nga afër skemën.

“Është e mundur që shtetet anëtare të bashkëpunojnë me vendet jashtë BE-së në menaxhimin e migracionit”, thanë zyrtarët evropianë.

“Sky News” ka folur gjithashtu me PD-në, partia e qendrës së majtë dhe partia kryesore opozitare e Italisë, për planin.

Pierfrancesco Majorino, kreu i politikave të migracionit, e përshkroi atë si “të turpshme”.

“Është një operacion i dështuar që shkel të drejtat e njeriut. Është një shfaqje e dëmshme dhe e shtrenjtë.”

Ndërkohë, Riccardo Magi, nga partia pro-evropiane dhe liberale e ka quajtur projektin “Guantanamo italiane”, sepse “nuk respekton të drejtat e njeriut dhe ligjet ndërkombëtare”.