Qelaj: Mbi 1 mijë ankesa pranuam nga qytetarët për vitin 2023 – 608 prej tyre janë duke u hetuar

Avokati i Popullit, Naim Qelaj, në konferencën e fundvitit ka bërë të ditur se mbi 1 mijë raste është numri i ankesave që ka pranuar Avokati i Popullit.

Qelaj, në fjalimin e tij e ka përshkruar këtë vit si jo të lehtë dhe mjaft sfidues.

“Numri i ankesave që ka pranuar Avokati i Popullit këtë vit është 1 mijë e 571 nga qytetarët, rastet e hapura për hetim janë 608, numri i rasteve të hapura sipas versionit zyrtar është 38”, ka thënë ai.

Sfiduese, sipas tij ka qenë pjesa veriore e Kosovës ku ishin ballafaquar me largimin e personave të punësuar të komunitetit serb, deri tek rasti në Banjë më 24 shtator ku Qelaj e vlerësoi si “tejet të rëndë”.

“Këtë vit u ballafaquam me situate të ndryshme, trazira e probleme që lidhen me braktisjen e institucioneve nga të punësuarit e komunitetit serb, viti i kaluar përfundoi me bllokada, vendosjen e pengesave për të përfunduar me një rast shumë të rëndë siç ishte ai i Banjës”.

Ai potencoi se nga Kushtetuesja akoma s’kanë pranuar vlerësim për dërgimin e ligjit për paga në sektorin publik nga Avokati i Popullit.

“Këtë vit kemi adresuar pesë raste në Gjykatën Kushtetuese. Rasti i parë është kërkesa drejtuar Gjykatës Kushtetuese për vlerësimin e përputhshmërisë lidhur me ligjin për paga në sektorin publik deri tek kjo kërkesë kemi ardhur për shkak të ankesave të shumta. Ligji është në pritje të vlerësimit nga Kushtetuesja, deri më sot s’kemi marrë një informacion se çfarë ka ndodhur me këtë”.

Ai tutje ka thënë se janë rreth 12 raste që janë duke u hetuar për sulmet që janë bërë ndaj gazetarëve në vitin 2023.

“Viti 2023 s’ka qenë vit i lehtë, ka qenë vit sfidues. Për sulmet ndaj gazetarëve ne kemi arritur t’i identifikojmë 12 raste për hetim, të cilat disa janë hetuar e disa janë në hetim të sipër. Kjo tregon që përcjellja e ngjarjeve nga mediat, raportimi i tyre ka ndikuar edhe në punën tonë”.

Ndërsa, ka potencuar se kanë reaguar edhe ndaj masave që ishin vendosur nga ministria e Industrisë, Ndërmarrësisë dhe Tregtisë ndaj mediumit Klan Kosova – për heqje të licencës së biznesit.

“Ne këtë vit kemi dalur me një reagim edhe ndaj masave të Klan Kosovës, duke theksuar që liria e shprehjes është e garantuar me Kushtetutë”.

Në vitin 2022, Avokati i Popullit kishte thënë se janë mbi 1 mijë raste ku ishin cenuar rastet e të drejtave të njeriut.

Nga rekomandimet që kishte nxjerrë Avokati i Popullit, në vitin 2022 nuk ishin zbatuar as gjysma e tyre, prej tyre janë 13 raste të hetimeve nga ankesat e qytetarëve dhe mbi 100 letra-rekomandime.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.