Paneli Zgjedhor për Ankesa dhe Parashtresa (PZAP) ka anuluar të gjitha fletëvotimet e dorëzuara përmes postës për rundin e dytë të zgjedhjeve lokale për kryetar në Komunën e Dragashit.
Elshani: Votat nga jashtë për Dragash ishin të manipuluara dhe orkestruara
Ndërsa anëtari i KQZ-së nga PDK, Arianit Elshani në një postim në Facebook ka thënë se PZAP ka konstatuar se procesi i votimit nga jashtë për komunën e Dragashit ka qenë i manipuluar dhe i orkestruar duke keqpërdorur të drejtën e mërgatës për votë.
“Që nga marrja e informacioneve se ky proces mund të jetë manipuluar, kemi ngritur shqetësimin tonë duke kërkuar një raport të detajuar dhe duke i ofruar publikut qasje në zarfe të cilat dëshmonin qartazi manipulimin e orkestruar”, ka shkruar ai.
Elshani ka thënë se ky është një mesazh i qartë për të gjithë ata që tentojnë të manipulojnë se nuk mund të fshihen brenda zarfeve e kutive të votimit.
“Prandaj ftoj prokurorinë që të merret deri në fund me zbardhjen e këtij orkestrimi dhe devijimi të vullnetit të qytetarëve të Dragashit”.
“Ruajtja e integritetit të zgjedhjeve dhe kredibilitetit të KQZ-së përherë do të jetë mision, për të ruajtur qëllimin e vërtetë të shprehjes së lirë të vullnetit të qytetarëve që të kenë një Deputet, Kryetar Komune, e Këshilltar Komunal legjitim”, ka thënë ai duke përgëzuar të gjithë “ata që kontribuuan në ndaljen e kontrabandimit!”.
Në Dragash ishte përmbysur rezultati pas numërimit të votave të ardhura nga diaspora, duke nxjerr fitues kandidatin e Lidhjes Demokratike të Kosovë (LDK), Bexhet Xheladini, i cili kishte marr gjithsej 244 vota, ndërsa kandidati i cili me votat e 14 nëntorit doli fitues, Shaban Shabani nga Partia Demokratike e Kosovës (PDK), nga diaspora kishte arritur të marr vetëm 54 vota.
Kjo ishte bërë e ditur pas përfundimit të numrimit të votave me postë në Qendrën e Numrimit dhe Rezultateve (QNR) për raundin e dytë të zgjedhjeve lokale të cilat u mbajtën me 14 nëntor.
Në bazë të rezultateve preliminare të publikuara nga KQZ-ja, kandidati i PDK-së, Shaban Shabani kishte arritur të fitoj 5 mijë e 648 vota me një epërsi prej 47 votash në raport me kandidatin e LDK-së, Bexhet Xheladini i cili kihte fituar gjithsej 5 mijë e 601 vota.
Mirëpo, PDK kishte bërë ankesë lidhur me këto vota, pasi që dyshohej se ishin manipuluar.
/Albanianpost.com
