Pushteti, opozitës: S’keni konsensus të brendshëm për shkarkimin e Kurtit

Shefja e Grupit Parlamentar të Lëvizjes Vetëvendosje, Mimoza Kusari-Lila, ka deklaruar se s’do ta mbështesin kërkesën për mocion mosbesimi të një grupi parlamentar.

Kjo pasi konsideron se s’ka konsensus brenda partive të opozitës për të arritur mocionin e mosbesimit ndaj Qeverisë.

“Tri grupet parlamentare të opozitës kanë 42 vota bashkë 2 vota janë të deputetëve të pavarur nëse 44 vota nuk ju bashkohen 16 vota të LVV-së sipas deklarimit të tyre atëherë shanset për çfarëdo suksesi të mocionit janë të vogla”, ka thënë Kusari-Lila pas mbledhjes së kryesisë.

“Të gjitha këto nuk mund të bëhen në nivelin e deklarimeve politike nga grupime të veçanta për të caktuar një datë të zgjedhjeve në një datë më të afërt sesa zgjedhjet e rregullta”.

Sipas saj, duhet të ketë edhe “seriozitet” edhe “përkushtim” të partive politike për dialog të mirëfilltë.

“Përderisa grupet politike të opozitës nuk e kanë këtë duket pak joserioze të kërkohen votat e pozitës për të shpërbërë Kuvendin apo për të mbështetur mocionin e mosbesimit”.

Edhe shefi i Grupit Parlamentar nga Lidhja Demokratike e Kosovës (LDK), Arben Gashi, ka thënë se opozita s’ka numrat për ta rrëzuar Qeverinë Kurti.

“Kjo mbetet në vendimmarrjen e kryeministrit sepse ai është në situatën e paaftësisë vendimmarrëse”

“Kurti shihet i dorëzuar përballë paaftësisë në qeverisje dhe shkaktimit të dëmeve të njëpasnjëshme për Kosovën”, tha Gashi.

Ai shtoi se në është në detyrimin e tij që kreu i ekzekutivit t’u japë mundësi qytetarëve që të gjejnë një zgjidhje.

“Ai duhet të dorëhiqet dhe pastaj ne do ta shpërndajmë Kuvendin me 2/3. Ne nuk marrim mandat qeverisës, nuk përkrahim mandat qeverisës pa zgjedhje dhe deklarojmë publikisht se do të mbështesim një mocion për të shpërndarë Kuvendin”, ka thënë Gashi.

Ndërsa nga Partia Demokratike e Kosovës, deputetja Blerta Deliu Kodra, potencoi dy opsione për rrëzimin e Qeverisë Kurti.

“Kryeministri është dorëzuar, do të kemi ose shpërbërje të Kuvendit ose mocion të mosbesimit, këtë do ta vendos lidershipi i PDK-së”.

“Ne do të shkojmë drejt zgjedhjeve, PDK që një vit e gjysmë e ka përmendur që vendi duhet të shkojë sa më shpejt në zgjedhje”, tha ajo.

Albin Kurti, u zgjodh kryeministër i Kosovës në mars të 2021-së për herë të dytë sipas rezultateve preliminare të Komisionit Qendror të Zgjedhjeve (KQZ), ai shërbeu në të njejtën pozitë nga shkurti deri në qershor të 2020-së.

Rezultate këto që vinin nga zgjedhjet e mbajtura më 14 shkurt të vitit të ngjashëm.

Nga këto zgjedhje Lëvizja Vetëvendosje (LVV), siguroi 58 ulëse, Partia Demokratike e Kosovës (PDK) siguroi 19 ulëse, Lidhja Demokratike e Kosovës (LDK) siguroi 15 ulëse dhe Aleanca për Ardhmërinë e Kosovës (AAK), 8 ulëse.

KQZ-ja njoftoi se LVV-ja në zgjedhjt e 14 shkurtit kishte fituar 438 mijë e 335 vota (50.28%), PDK-ja 148 mijë e 296 (16.90%), LDK-ja 110 mijë e 978 (12.64%) dhe AAK-ja 62 mijë e 111 vota (7.07%).

Prioritetet e kryeministrit Kurti, të cilat u paraqiten me fitoren e zgjedhjeve të 14 shkurtit ishin lufta kundër korrupsionit dhe punësimi, vaksinimi i 60 për qind të popullatës kundër COVID-19 brenda një viti, rritja e prodhimit dhe eksportit si dhe fuqizimi i ndërmarrjeve publike.

Ai edhe me fitoren e zgjedhjeve thoshte se dialogun me Serbinë s’do ta kenë pjesë të prioriteteve, duke paralajmëruar vendosje të reciprocitetit ndaj Serbisë.

Gjatë fushatës zgjedhore për zgjedhjet e 14 shkurtit, lideri i Lëvizjes Vetëvendosje, Albin Kurti, kishte prezantuar programin e ardhshëm qeverisës të partisë së tij, duke thënë se dëshirojnë “të nxjerrin Kosovën nga kriza e shumëfishtë dhe ta vendosin në binarët e progresit”.

Në zgjedhjet e 14 shkurtit, nga mbi 1.7 milion qytetarë me të drejtë vote kanë votuar 48.78 për qind dhe vota të vlefshme, sipas KQZ-së, kanë qenë 877 mijë e 503.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.