Një kulturë toksike e sulmeve seksuale, ngacmimeve dhe racizmit është pretenduar nga më shumë se 100 pjesëtarë të stafit aktual në Mbretërinë e Bashkuar në pikat e zinxhirit të McDonald’s.
Pretendohet se punonjësit, disa të rinj deri në 17 vjeç, janë duke u ngacmuar thuajse në mënyrë rutinore.
Mbikëqyrësi britanik i barazisë ka thënë se është “i shqetësuar” nga gjetjet e BBC-së.
Kurse McDonald’s ka pranuar se ka dështuar dhe ka kërkuar falje.
BBC e nisi hetimin e kushteve të punës në McDonald’s në shkurt, pasi kompania nënshkroi një marrëveshje ligjërisht të detyrueshme me Komisionin për Barazi dhe të Drejtat e Njeriut (EHRC) në të cilën u zotua të mbronte stafin nga ngacmimet seksuale.
Por hetimi ka zbuluar një pamje krejtësisht të ndryshme.
Gjatë një periudhe pesë mujore, ekipi i BBC-së ka kontaktuar punonjësit për t’i pyetur për përvojat e tyre të punës.
Nga më shumë se 100 akuza nga punonjësit me të cilët ata folën, 31 kishin të bënin me sulme seksuale dhe 78 në lidhje me ngacmimet seksuale.
Po ashtu kanë dalë edhe 18 akuza për racizëm, ndërsa gjashtë persona kanë ngritur pretendime për homofobi.
Shumë punonjës kanë treguar se menaxherët e McDonald’s në pikat e shitjes në të gjithë Mbretërinë e Bashkuar janë përgjegjës për ngacmimet dhe sulmet.
Shumë shpesh, menaxherët e lartë thuhet se kanë dështuar të veprojnë në lidhje me ankesat.
Stafi gjithashtu i ka thënë BBC-së për marrëdhëniet seksuale midis menaxherëve dhe anëtarëve më të rinj të stafit, gjë që është kundër politikës së kompanisë.
Të rejat kanë përshkruar se ndjehen të gjykuara vazhdimisht për mënyrën se si duken.
McDonald’s është një nga punëdhënësit më të mëdhenj të sektorit privat në Mbretërinë e Bashkuar.
Gjigandi i ushqimit të shpejtë ka më shumë se 170 mijë njerëz që punojnë në 1 mijë e 450 restorante.
Stafi i saj është gjithashtu një nga fuqitë punëtore më të reja në vend. Tre të katërtat e punonjësve janë të moshës nga 16 deri në 25 vjeç.
Për shumë, kjo është puna e tyre e parë.
Sakaq, shumica e tyre nuk janë të punësuar drejtpërdrejt nga kompania pasi McDonald’s përdor një sistem ekskluziviteti, që do të thotë se operatorët individualë janë të licencuar për të drejtuar pikat dhe për të punësuar stafin.
Shelby ishte vetëm 16 vjeçe kur filloi të punonte në një restorant McDonald’s në Berkshire vitin e kaluar.
Ajo ka treguar se kolegët më të vjetër meshkuj përdornin vendin e ngushtë në kuzhinë si një justifikim për të prekur në mënyrë të papërshtatshme stafin e ri të vajzave.
“Ata preknin stomakun, belin, barkun”.
“Në çdo turn që punoja, të paktën do të bëhej një koment, ose do të ishte një gjë më e rëndë, si të më kapnin barkun, të më kapnin ijët”.
Ajo ka thënë se ishte një burrë në të 50-at, në veçanti, për të cilin menaxherët paralajmëruan anëtarët e rinj të stafit që të qëndronin larg.
Një ditë verën e kaluar, ajo po qëndronte në banakun e përparmë kur ai doli pas saj dhe e kapi, duke e tërhequr në ijë.
Shelby i tha menaxhmentit të lartë për atë që po ndodhte, por asgjë nuk u bë. Në emailin e saj të dorëheqjes, ajo tha se ishte një mjedis toksik pune.
Ndërkohë, McDonald’s ka thënë se është duke hetuar pse çdo çështje që ajo ngriti nuk u përshkallëzua zyrtarisht në atë kohë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
