Pse ka rëndësi çmimi i paqëndrueshëm i aluminit?

Në Nevada të Shteteve të Bashkuara të Amerikës, në një fabrikë të vogël birre qëndrojnë në pritje për t’u mbushur mijëra kanaçe alumini.

Derisa të mbushen me birrë dhe t’u dërgohen shitësve me pakicë, Wyndee Forrest, bashkëthemeluesja e CraftHaus Brewery, nuk do të fitojë para.

Por biznesi u detyrua t’i grumbullonte kanaçet.

Firma ka mbajtur në magazinë furnizimin e kanaçeve për një muaj, por duke pasur parasysh turbulencat në tregun e aluminit, është e shqetësuar se furnitorët nuk do të jenë në gjendje të përmbushin datat e dorëzimit.

Çmimi i kontejnerëve është rritur afërsisht 18 për qind çka është shqetësuese për Forrest dhe kolegët e saj.

Dhe alumini përdoret në një shumëllojshmëri produktesh, nga kornizat e dyerve te avionët.

Teksa çmimi bazë për aluminin e tregtuar në bursën e metaleve të Londrës ka rënë përsëri në dy muajt e fundit, mbetet më shumë se 65 për qind mbi nivelet para pandemisë.

Gjatë pandemisë, kërkesa për alumin u luhat.

Në fillim të bllokimeve, shitjet e metalit ranë pasi punëtorët duhej të qëndronin në shtëpi. Më pas, u rritën përsëri pasi shumë vende dolën nga bllokimi.

Kjo bëri që rezervat e aluminit në depo të varfëroheshin.

Sakaq, pushtimi rus i Ukrainës ka shtrënguar më tej furnizimet dhe e ka shtyrë çmimin akoma më lartë.

“Shumë blerës të aluminit në Evropë janë thuajse të vetësanksionuar dhe refuzojnë të prekin aluminin rus”, ka treguar specialisti Uday Patel.

Por edhe para konfliktit, rritja e çmimeve të energjisë shkaktonte probleme në objektet e shkrirjes së aluminit. Pushtimi thjesht e përkeqësoi situatën.

Së fundmi, firma amerikane Alcoa vendosi të mbyllë një fabrikë shkrirjeje në Spanjë për dy vjet, deri në vitin 2024, për shkak të çmimeve të larta të energjisë.

Edhe shkritoret e tjera i kanë mbyllur ato ose kanë ulur prodhimin në muajt e fundit.

Sipas Patel, Evropa do të humbasë rreth 900 mijë tonë prodhim primar të aluminit në vitin 2022.

“Ndryshe nga disa prej metaleve të tjera bazë, alumini është shumë i ndjeshëm ndaj ndryshimeve në çmimet e energjisë”, ka treguar Keith Wildie, kreu i tregtisë në një firmë të riciklimit të metaleve.

Kjo për shkak se gati gjysma e çmimit të aluminit primar vjen nga kostot e energjisë të shkaktuara në prodhimin e tij.

“Kam qenë në industri për 30 vjet. Nuk kam parë ndonjëherë diçka të tillë për sa i përket paqëndrueshmërisë së çmimit të lëndës së parë”, ka thënë drejtuesi i një fabrike të prodhimit të dyerve, Colin Shorney.

Produktet e tij shkojnë në të gjitha llojet e ndërtesave, nga shkollat në stacionet e policisë. Por një zinxhir i madh hotelesh, po e lë në pritje një projekt të ardhshëm për shkak të kostos në rritje të materialeve.

Në të njëjtën kohë, bizneset po përballen me rritje të tjera të kostos që komplikojnë problemin e aluminit.

Në Nevada, Forrest shpjegon se ajo i blinte në mënyrë rutinore kanaçet nga një furnizues në Kaliforni.

“Ishte rreth 300 dollarë për të dërguar një paletë kanaçe te ne. Porositëm një tjetër paletë kanaçesh, pesë ditë më vonë, ishte tre mijë dollarë. Ishte tronditëse”, ka treguar.

Prej asaj kohe, CraftHaus ka kaluar në porositjen e kanaçeve nga një furnizues më afër për të siguruar që kostot e transportit të mbeten të menaxhueshme për firmën.

Por cila është perspektiva për pjesën tjetër të vitit?

Wildie mendon se kufizimet e furnizimit të aluminit ka të ngjarë të vazhdojnë për disa kohë.

Firma si e tij, që riciklojnë aluminin për momentin po mbushin boshllëkun.

Megjithëse oferta globale e aluminit vazhdon të jetë e ngushtë, kërkesa potencialisht mund të ftohet ndjeshëm në muajt e ardhshëm.

Tashmë, frika e një recesioni të ardhshëm ka trembur disa blerës të aluminit në SHBA.

Norsk Hydro, një prodhues i madh norvegjez i aluminit që shënoi fitime rekord në tremujorin e fundit, ka treguar se perspektiva është e ngjyrosur me pasiguri.

Kurse Patel parashikon një ngadalësim të ekonomisë globale, e cila mund të reduktojë kërkesën dhe prodhimin e aluminit në një shkallë të gjerë.

Duke reflektuar mbi koston aktuale të materialeve të ndërtimit në përgjithësi, Patel ka shtuar se “kur këto gjëra ndodhin, ju kaplon paniku”.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.