Pjesëmarrje e detyrueshme me mungesa të pajustifikuara.
Ky ka qenë mesazhi i njoftimit paraprak për mbledhjen e Asamblesë Kombëtare të socialistëve e cila do të mbahet këtë të dielë të 11 shkurtit.
Ishte sekretari i Përgjithshëm, Blendi Klosi i cili në një mesazh drejtuar anëtarëve të Asamblesë – u shpreh se ky takim vjen në zbatim të vendimit të Kongresit për raportimin e Detyrave të lëna në kuadër të Rienergjizimit të Partisë, me kërkesën e Kryetarit të PS-së, Edi Rama.
Mbledhja vjen pas asaj çfarë Rama ka përmendur një Kongresin e fundit të Partisë, ku foli edhe për riorganizimin e strukturave në themel të PS-së, për zgjedhjet e ardhshme.
Një analizë e thelluar për detyrat që drejtuesit në bazë kanë pasur në zgjedhjet e fundit gjithashtu pritet të bëhet, me qëllim vlerësimin e tyre në fushatën e shkuar dhe nëse është e nevojshme, zëvendësimin e tyre.
Kjo e fundit vetëm nëse shihen rezultate jo të kënaqshme në qarqet e caktuara.
Teksa, në mars, pritet edhe të mbahet Asambleja Kombëtare e Partisë Socialiste, por ende nuk është caktuar një datë për këtë.
Në prill ndërkaq pritet të mbahen edhe zgjedhjet për delegatët e Kongresit të PS-së.
Ndryshime socialistët bënë edhe brenda strukturave, pas zhvillimit të Kongresit të Jashtëzakonshëm të 8 dhjetorit, ku Asambleja Kombëtare votëbesoi strukturat e reja brenda forcës së majtë.
Në terma konkretë, në detyrën e Sekretarit të Përgjithshëm u konfirmua Blendi Klosi, i cili do ta vijojë ushtrimin e funksionit në këtë pozitë.
Ardian Çela u zgjodh sekretar organizativ i socialistëve.
Eduart Ndreca nga ana tjetër do të jetë sekretar i burimeve njerëzore.
Sekretare e gruas do të jetë Evis Kushi, teksa Etjen Xhafaj vijon të mbajë rolin e sekretarit digjital dhe të rinisë.
Eridjan Salianji po ashtu konfirmohet në pozitën e sekretarit për çështjet zgjedhore.
Sekretare e programit do të jetë Milva Ekonomi dhe Romina Kuko, do të mbajë pozitën e sekretares për marrëdhëniet me jashtë.
Kjo, i paraprin Kongresit Zgjedhor të pranverës ku do të votohet dhe për anëtarët e rinj të Asamblesë, të cilët pas konstituimit kanë detyrën të zgjedhin Kryesinë e re mes emrave të propozuar nga kryesocialisti.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
