Shqipëria

Protesta e Berishës, konfirmim për mobilizimin e opozitës shqiptare?


Jo shumëkush e pati pritur se do të kishte një tubim të madh nga ana e Partisë Demokratike, të enjten e 7 korrikut, kur temperaturat dhe koha jo e favorshme, ishin kundër gjasave për pjesëmarrje masive.

Mirëpo, Partia Demokratike, me në krye të saj Sali Berishën, e vërtetoi se mundi ta mobilizonte opozitën e vendit dhe të thërriste një demonstratë të madhe kundër qeverisë, ku në dy orë, nuk u regjistrua asnjë incident.

Sipas analistit Fatos Lubonja, kjo ngjarje e vërtetoi se opozita mund të mobilizohet. Një tjetër gjë që e vërtetoi, ishte pa diskutim edhe sa njerëz vetë Sali Berisha, mund të grumbullojë përballë Edi Ramës, në fjalët e analistit.

“Ndoqa të gjitha fjalimet dhe them se si pjesëmarrje konfirmohet një aftësi e PD për të mbledhur njerëz kur i duhen nga e gjithë Shqipëria. Do thosha se numri është po aty kur ishin Sali Berisha dhe Lulzim Basha bashkë, pak më shumë apo pak më pak diçka”, shtoi Lubonja.

Analisti Fatos Lubonja

Sipas gazetarit Baton Haxhiu nga ana tjetër, pavarësisht se ai prej kohësh është kundër retorikës politike të Berishës, është befasuar nga pjesëmarrja e lartë në protestë dhe nga aftësia e kreut të demokratëve për ta arritur atë.

“Domethënë, njeriu i gabuar, i cili para vetes ka non-gratën, fjalimet e ambasadës dhe Departamentit të Shtetit, gjithë njerëzit përreth, një pjesë të analistëve, një pjesë të mediave dhe të bëjë një gjë të tillë… S’kam çfarë i them më!”, ka thënë Haxhiu i ftuar në emisionin “Opinon”.

Gazetari Baton Haxhiu

Sipas tij, kjo ka shumë shpjegime. Por sot njeriut që politikisht nuk e do, ia jep dorën për atë që ka bërë.

Një kthim të “ndërgjegjes” pati edhe nga disa deputetë demokratë, të cilët kanë qenë më parë kritikë me Berishën, por pjesë e tubimit janë bërë.

Ndër ta, deputetët Grida Duma, Dhurata Çupi apo Dashnor Sula.

Gjithsesi, sipas gazetarit Artur Zheji, faktikisht, këta deputetë thjesht po përpiqen të çtensionojnë raportin me Berishën, pasi e kanë kuptuar se ky i fundit, është forca kryesore në PD.

Gazetari Artur Zheji

“Janë deputetë që shkojnë nga anon forca. Që forca është nga Berisha shkojnë nga Berisha. Këta janë numra që doktorit i duhen për garniturë tani, sepse ai e ka marrë realisht drejtimin e PD-së”, theksoi Zheji.

Teksa, politologu Julian Zyla, e mendon krejtësisht në rrafsh të kundërt situatën, pasi mendon se pjesëmarrja e tyre, do t’ja ulë vlerat po vetë atyre.

“Nuk është një gjë e mirë të tregosh se në vend që të bësh llogaritë e njerëzve bën llogaritë e tua dhe sheh ku do jetë lapsi që do bëjë listën e re të deputetëve. Po ndjekin pikërisht lapsin. Duket se janë si magnet duke ndjekur, lapsin metalik, për të kuptuar se kush do bëjë listën”, nënvizoi ai.

 

Çfarë mbetet për t’u parë tashmë, është aksioni opozitar i Berishës dhe mbështetësve të tij, ku protesta të tjera janë paralajmëruar në vazhdim.

Nëse do të pritet shtatori apo do të vijohet edhe gjatë korrikut e gushtit, është ende e paqartë.

Siguria e vetme, shfaqet nën emrin e Berishës, i cili tashmë duket i palëkundshëm në krye të PD-së dhe aksionit të saj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore